Mizoram a zan khat cham tura vawiin a lo thleng Union Minister of State (Independent Charge) for Environment, Forest and Climate Change, Pu Anil Madhav Dave chuan vawiin tlai khan State Guest House Conference Hall-ah Environment, Forest and Climate Change Department leh Advanced Research Centre for Bamboo and Rattan (ARCBR) hotute leh Mizoram Pollution Control Board (MPCB) member-te nen inkawmna hun a hmang a. He meeting ah hian EF&CC Minister Pu Lalrinmawia Ralte pawh a tel a ni.
Union Minister chuan Department te hmalakna leh harsatna tawh te ngaithla in, a remchan dan ang zela hmalak pui a tum thu a sawi a. Ramngaw leh nungcha humhalhna kawngah te, faina leh thianghlimna vawn leh bawlhhlawh sawngbawl danah te thiamna thar, technology hmanga proposal siam tur a awm anih chuan Sorkar laipuiin a lo ngaihven tur thu a sawi a. Capital city te chu state a khawpui dang nena khaikhin chuan a langsar ber an nih thin avangin bawlhhlawh langsar a awm tur anilo a ni, Union Minister chuan a ti bawk a. Bawlhlawh paih leh sawngbawlna kawngah pawh lui leh dil tibawlhhlawh lo va, nakin hun thlir tel a hmalak thiam pawimawh zia a sawi a ni.
Minister Pu Anil Madhav Dave chuan Sorkarah chuan sum leh thawktu indaihloh hi khawi state ah pawh kan harsatna tawh langsar ber a nih thu sawi telin, hemi avang hian hna kan thulh emaw, kan thawh chhiat phah tur erawh anilo a ni, a ti a. Sorkar hnathawkte chuan an hna chu an hlawh hmuhna anih vanga thawk satliah mai lovin, mahni hna a tuina tak tak leh mahni state hmasawn duhna thinlung nen hna an thawh chuan eng harsatna leh indaihlohna karah pawh hmasawnna a thang ngei ngei thin a ni, a ti.
Forest Minister Pu Lalrinmawia Ralte pawhin thu sawiin, Sorkar laipui a EF&CC Ministry in Minister ah environment vei leh hemi lama thiamna tak tak nei, sulhnu pawh lo nei nual tawh a chang chu thil lawmawm tak a nih thu sawi a. Mizoram Forest Department hmalakna leh hmalakpui an ngaihna Memorandum an siam te chu a thlen nghal a. A theih dan anga Union Minister chuan a lo ngaihtuah sak a beisei thu a sawi bawk.
Meeting hi EF&CC PCCF Pu Lalramthanga, IFS chuan a kaihruai a. Mizoram Pollution Control Board Chairman Pu R.C. Thanga, IFS (Rtd.) leh Advanced Research Centre for Bamboo and Rattan hotute pawhin an indaihlohna hrang hrang, Sorkar laipui atanga hmalak pui ngai ang te an thlen bawk a ni.
EF&CC Department in Union Minister of State hnena an memorandum thehluh zingah hian Capacity Building Block for Forest Training Institute sakna tur leh Green India Mission hnuaia sum release dan chungchang te, Wet Lands Development Scheme hnuaia state leh central sorkar sum intumsem dan chungchang te, NPV rate leh State Forest Service-te India Forest Service-a an luh chhoh dan chungchang te a tel a ni.
