Mizoram Environment & Forest Consultative Forum (MEFCOF) chuan vawiin khan Hawla Auditorium-ah ‘Awareness Campaign on protection of Environment-cum-General Assembly’ an hmang a; he hunah hian Chief Minister Pu Lal Thanhawla chu Khuallian niin NLUP Implementing Board Vice-Chairman Pu P.L.Thanga chu Khualzahawm a ni bawk.

MEFCOF General Assembly hawnna inkhawm MEFCOF President Pu V.L.Bela kaihhruaiah Khuallian Chief Minister Pu Lal Thanhawla chuan tunlai khawvel boruak, sik leh sa inthlak danglam chak leh hlauhawmzia hrechiangtu apiangin ang vei em em, boruak tha leh hrisel siamthar a nih theih nana ngaihtuahna seng a, thahnemngai taka thawktu MEFCOF chungah lawmthu a sawi a. Ramchhung state dangte nen khaikhin chuan Mizoram chu Kerala nen ‘state hring’ (green state) ber zingah tel mahse a taka a dinhmun chu ramngaw tak tak (dense forest) chu zaa 1% chauh a awm tawh a ni, a ti. Mizoram sorkar chuan kum 1998 atang khan thing leh mau leh nungcha humhalh kawngah hma la  daih tawh mahse a mipui mimirte hemi kawngah an la thangharh tawk loh avangin hmalak chak a har viau thin a, tunah erawh chuan global warming leh climate change ten Mizoram pawh a rawn nghawng pha hial takah chuan mimal, chhungkua, pawl leh sorkar ang pawhin environment siamthat leh humhalh kawngah an thawh hlawk tan tawh hle a; Central YMA pawhin kumpuanah a lo hman tawhna avangin mipui zau zawkin awareness an neih phah a, mahni phak tawka thahnemngaitu zawng zawngte chungah Chief Minister chuan lawmthu a sawi. Mizote chu ringtute kan nih angin Pathianin ram min pek hi duat taka enkawl leh Pathianin tha a tih em em thilsiam zawng zawngte humhalh hna thawk tur kan ni lehzual a ni, a ti bawk. Kum 20 rambuai hnuah remna leh muanna a lo awm a, mipuiten an mamawh ber chu eizawnna ngelnghet neih leh intodelh a nih avangin sorkar chuan Land Use Policy/NLUP a duang ta a; a hmasa zawkah pawh chhungkua mamawhte hnenah rangva bundle 3 leh cheng singkhat theuh sem a ni a, rinawm taka an tanpuina dawngte hmang thiamte chuan tun thlengin dinkhawchhuah nan an hmang a ni, a ti. Tuna NLUP kalpui mekah pawh ei leh bar lamah mi harsa zawkten leirem an rap ve theih nan tanlak a nih rual rualin ramchhunga thing leh mau, lui leh nungchate humhalh a, ramngaw tihchereuh tawh siamthar nana thingphun uar te chu sorkar ruahmannaah a tel vek a ni, a ti. Vawiina ram luah mekten ramngaw humhalh a, ram kan siamthat loh chuan thangtharten anchhia min la lawh dawn a, chuvangin mitin mawhphurhna a nih ti hriaiin theihtawp chhuah theuh ila, sorkar pawhin mipuite nen pheikhai rual takin Mizoram chu state entawn tlakah kan siam theih a ni, a ti.

Khualzahawm Pu P.L.Thanga pawhin thusawiin NLUP kalpui mekah nungcha awmsa humhalh leh environment siamthat chu ruahmannaah a tel sa a, NLUP hnuaia tanpuina sum leh thildang semchhuah thinte chu hriathlawh hle mahse NLUP kaltlanga environment siamthat tumna hi sawi a hlawh tawk lo thin a ni, a ti a. January, 2011 atanga Mizoram-ah NLUP kalpui a nih hnuah UNO beng pawh a verh hle a; ni 16th October, 2014 khan thawhhona thuthlung ziah niin UNO hnuaia peng pakhat FAO chuan nasa takin hma an rawn la mek zel bakah Minnesota University, USA atangin mithiamte chu lo kalin NLUP kalpui dan leh a hlawhtlin dante an rawn zir mek a ni, a ti bawk. Kum 2012 atang phei kha chuan Mizoram Gross Domestic Product (rampum dehchhuah) leh Per Capita Income (mimal hlawhchhuah) te chu rampum aiin a la sang zawk zel a ni tih a tarlang.

Vawiin MEFCOF General Assembly hawnna inkhawmah hian ‘Zotheihuan Thlalak Intihsiak’naa lawmman 1-na atanga 3-na te chu Khuallianin a sem nghal a. Lawmman latute chu :

1-na : Sangpuia Chhakchhuak

2-na : Aldrin V.L.Rochana

3-na : Zorama Khiangte, Lalthlamuana & P.B.Rosangliana te an ni.

MEFCOF General Secretary Pu H.Chhawntluanga chuan an hmalakna hrang hrang Report a pe a, an hmalakna zawng zawnga theihtawp chhuahpui thin Mizoram sorkar, a bik takin Chief Minister leh NLUP hotute chungah lawmthu a sawi a. MEFCOF Vice-President Pi Lalnipuii’n lawmthu sawina hun hmangin inkhawm a khar a ni.