Vawiin khan Vairengte Community Hall ah Sub-Hqrs YMA, Kolasib hmalakna a HIV/AIDS, Sanitation leh Wildlife protection neih tur chu Kolasib Addl DC Pu Laltanpuia Hnamte in a hawng.

Hawnna inkhawmah hian khuallian chuan thu sawiin heng kawnga awareness campaign a ngaihna chhan bulpui ber chu sual hnathawh a nih thu a tarlang a, tunlai khawvel changkang zel ah kan ngaihhlut zawng leh ngaihsan zawng te her rem thiam a hun tawh a ni ati. Kolasib chu India ram pumpuia HIV/AIDS darh chakna ber District a ni tiin a chhan bulpui ber chu Sex vang a nih thu a tarlang a hei hian nasa taka inenfiah a tul thu a sawi a ni. Sex chungchanga inzirtirna (Sex Education) chu zahmawh rawngkaia ngai mai loin chhungtin a nu leh pa ten mahni fate chu zirtirna dik leh langtlang taka inhrilhhriat a pawimawh thu a sawi a, zah a lak chi a niloa tlang taka inzirtir a hun tawh takzet zawk a ni a ti. Faina leh Thianghlimna chu mihring taksa leh rilru ti hriseltu a nih angin chhungtin ten mahni kawtkai leh inchhungkhur boruak atanga inzirtir a pawimawh thu a sawi a, hemi bakah hian ramngaw leh nungcha te chu tichereu mai loa Silai ai ah camera te humin nungcha te humhalhna chang hria in, hun lo la awm zel tura kan tute tan boruak thianghlim leh tha hnutchhiah tu ni thei turin kalkhawm te chu a chah  ani.

Campaign hawnna inkhawm hi Pu C. Liankunga , President Sub-Hqrs YMA, Kolasib in a kaihruai a, PHE Department aiawhin thusawi ngaihthlak a nih bakah Environment, Forests & Climate Change Department aiawh in DFO Pu Lalnunzira’n thu a sawi a , Sub-Hqrs YMA aiawh in Pu R.Lalzokima-Asst Secy in thu a sawi ve bawk a ni. Awareness Campaign hi Kolasib District chhunga hmun hrang hrang heng Bilkhawthlir, Kawnpui leh Bairabi ah te neih bawk tura ruahman a ni.

Attachment

  • Loading attachment...