Chief Minister Pu Lal Thanhawla'n vawiin khan Multipurpose Hall, Tourism Complex, Berawtlang ah Mizoram Sawrkar hnuaia thawk Graduate engineer te intelkhawmna pawl Mizoram Engineering Service Association (MESA) inkhawmpui vawi 37-na chu khuallian niin a hmanpui. 

Chief Minister Pu Lal Thanhawla chuan Mizoramah company emaw, industry emaw mi tak tak eizawnna pe thei sawi tham a awm lova, Sawrkar tih loh chu hna petu leh siamtu ‘job provider lian a awm lova chuvangin kan pawm emaw kan pawm lo emaw sawrkar hnathawk te hi vohbik ‘privileged class’ in ni a ti a. Sawrkar a kal that theih nan a hnuaia thawk te leh a fawng vuantu tan langtlang taka hnathawh a pawimawh ber a. Mipui mamawh phuhru, an tana ding leh engkim an sawi ngamna ‘people friendly’ sawrkar kan mamawh a, chumi atan sawrkar leh mipuiah sawrkar hnathawk te hi in accountable a ni tih hi in hriat nawn fo a tha tiin a sawi. Sawkar khalhtu a hminga politician te hi kan inthlak thin a mahse sawrkar hnathawk te chu in inthlak ve lova, Sawrkar apiang in hawng taka inthawhpui hi Indian democracy in a phut a ni a, chutiang in thawh chu a pawimawh ber a ni, a ti bawk. 

Tunlai Sawkar hnathawk zingah tih tak zeta ram leh hmasawnna atana thawh tum leh an hlawh phu bak a thawh tumna nei an awm a hmuh thu sawiin heng mite hi an pu te leh senior ten in phurpui a pawimawh a, an thiamna te hi anih dan tur ang taka chhawr anih theih nan an innovative idea  leh an tumna te hi kan tihlawhtlin sak theih bakah nasa zawkin hma kan sawn theih ka ring a ni, a ti. Mahni hna rinawm takin taihmakna, takna leh Pathian tihna nen thawk turin engineer rual te hi a chah a. Sawrkar hna leh Sawrkar pawh tluang taka a kal theih nan Department hrang hrang inkara inpawh taka thawhho leh hma lak ho a pawimawh thu sawiin kan zavaia that tlanna tur atan theihthawp kan chhuah hi engineer rual te chu Department dangte nen coordination leh cooperation nei thaa thawhpui thiam turin  a fuih a.  Thangthar ten an hna ah quality tha leh a tha thei ang ber atan hmalakna chang an hria chu lawmawm a tih thu a sawi bawk. 

Kut tling lova sum lak tum ten hmasawnna hna hrang hrang an tih sukuk dan sawiin a hun laia tih that loh vangin a hnua kan tuar leh thin hi a pawi hle a, hei hi a takin Tuirial Hydel Project-ah kan hmu a, a hunlaiin zo ila chuan a kawlpetha siam zawng za a za hi kan ta a ni tur a ni a mahse tunah chuan za ah 12 chauh kan ta tur a ni dawn a. Engineer te chu heng kut tling lova sum lak tum te ven that hi kan hna a ni em tia ngaituahna seng se tiin a duh thu a sawi. 

General Conference hi MESA President Pu Vanlal Tlana'n kaihhruaiin inlawmna thu a sawi a. MESA General Secretary Pu Lalropuia chuan Pawl hmalakna hnathawh leh Conference hmasa thurel bawhzuina te sawiin a hnen atangin Report ngaihthlak a ni a. Member thar lawmluhna, kaisangte lawmpuina, pension-a kal te thlahna leh member boral ta te sunna hun hman a ni bawk a. Pawl Adviser Pu Lalsawmvela leh Patron Pu Dunglena te pawhin thu an sawi a ni. MESA Vice President Pu Bowman’n lawmthu sawiin hun a khar a ni. 

MESA in vawiina programme ah  Chief Minister’s Relief Fund atan Chief Minister kutah cheng 50000 an hlan a ni. 

Chawhnu lamah MESA hruaitu thlanna neiin Business Session Agenda chhawpchhuah te sawi hoin hun an hmang bawk a ni. 

MESA ah hian Member 377 an awma, hetah 44 te chu Associate Member an ni a, MESA Member te hi PWD, PHED, P&E Department, Minor Irrigation Department leh Department danga thawk Graduate Engineer te an ni.