Vawiin khan Department of Social Work,Mizoram University (MZU) leh Krishi Vigyan Kendra (KVK) Selesih te bultuma  VC House Sihphir-a neih ‘ Capacity Building and Training for Farmers’ chu Social Welfare Minister Pu P.C Lalthanliana’n a hmanpui. 

Social Welfare Minister chuan awmze nei taka hnathawh leh  mahni dinhmun dik tak hriatchian hi hmasawnna bul a ni, a ti a.  Mahni ngaihdana kal mai lovin a thiam zawk te thurawn leh zirtirna te zawm hi a finthlaka, tunlai thiamna hmang tangkai thei turin training tha tak neih hi a tul hle a; training hmang tangkai apiang an dingchang thin a ni,  Minister chuan a ti a.  Mizorama cheng mipui tam zawk  kuthnathawktu an nih avangin ram sum leh pai, hmasawnna leh kal zel dan tur an chungah a innghat thui hle a, hei hian mipuite leh sawrkar in mamawh tawnzia a tilang a ni, a ti a. Kalkhawmte chu sawrkara beisei nei reng chunga hna thawk lo tura  fuihin, a tul leh tanpui ngaih chinah chuan sawrkarin a tihtur a ti mai ang, Pu PC Lalthanliana chuan a ti a. Social Welfare Minister chuan sawrkar kal lai mek hnuaiah kuthnathawktu te  dinhmun chu a chhiatloh thu  sawiin, sawrkar chuan  New Economic Development Policy (NEDP) hmangin kuthnathawktu te tana tangkai tur hrang hrang heng; kawngtha, thlai tharchhuahte dahthatna leh a hralhna  te a ngaihtuah sak  dawn a ni, a ti.

Minister chuan Department of Social Work ,Mizoram University (MZU) leh Krishi Vigyan Kendra (KVK) Selesih te bultuma kuthnatawktu te tana training buatsaih ani chu lawmawm a ti a, training atanga thil zir te chu chhawr tangkai theuh turin kalkhawmte chu a chah a ni. 

‘Capacity Building and Training for Farmers’ programme hi Pi Rebecca LP Lalnunhlui, MSW (MZU) in a kaihruaia, Pi Rebecca Lalbiakngheti SMS,KVK, Selesih hnen atangin ‘Precaution and safety handling of Agricultural Chemical’ tih leh Pu Lalvensanga Pachuau hnen atangin ‘ Soil Sampling Procedure’ tih thupui hmang te a Presentation ngaihthlakna leh zirhona neih a ni a. Pu Vanlalruata Tochhawng, MSW (MZU) in lawmthu sawina neiin training hi khar a ni.