Vawiin chawhma khan Art and Culture Department buatsaih International Museum Day chu Chief Secretary, Pu Lalmalsawma hovin Mizoram State Museum-ah hman a ni a. Pu Lalmalsawma chuan hetiang function buatsaih anih hi lawmawm a tih thu sawiin pi leh pu te sulhnu hlutsak hi hnam changkang zia a ni, a ti a. Mizo te pawhin hlutsak zel nachang kan hriat a pawimawh a ni, a ti bawk. 

Art & Culture Secretary Pi Thanhliri Pachuau chuan he hun hi kaihruaiin Museum Curator, Pu Lalchuailova chuan report a pe a. Art and Culture Director Pu R.Hmingthanzuala chuan lawmthu sawina in hun a khar a. He programme -ah hian Mizo culture leh tradition humhalh leh vawn nun kawnga mi pawimawh te telin hmasawn zel dan tur an sawiho nghal bawk a ni. 

International Council of Museums (ICOM) chuan May Ni 18 hi International Museum Day atan kum 1977 khan a puang a, ICOM hnuaia museum 35,000 chuangin khawvel hmun hrang hrangah he hun hi an hmang a. Mizoram-ah chuan kum 2005 atang khan hman tan a ni a. Kum 2017-a he Ni thupui chu “Museums and contested histories: Saying the unspeakable in museums” tih a ni. 

Mizoram State Museum-ah hian Gallery 6 a awm a, chungte chu Zoology, History & Mineral Gallery, Anthropology, Ethnology, Textile, Archaeology te an ni. Tun dinhmunah hian showcase 107-ah objects hrang hrang 768 pho chhuah mek a ni a. Museum en man hi naupang tan Rs.10 niin puitling tan Rs.20 a ni a; sikul naupang zirtirtu nena en chu man chanve a tihhniam sak an nih bakah kum 65 chin chunglam tan en man a  awm lo a. Kum 2016-2017 chhung khan tlawhtu mi 10147 an awm bawk a. International Museum Day pual hian Mizoram State Museum chu mipui en theih turin en man awm lova hawn a ni.