Kumin sawrkar kum chhunga a vawikhatna ni turin vawiin chawhma khan Lok Sabha MP Pu C.L.Ruala hovin Aizawl District Development Coordination & Monitoring Committee (DISHA) meeting chu New Secretariat Conference Hall, Aizawlah neih a ni.
Meeting kaihhruaitu Pu CL Ruala chuan meeting koh a nih chhan sawiin kumin sawrkar kum chhunga Aizawl District huamchhunga Centrally Sponsored Scheme (CSS) hrang hrang sawmhnih chuanga hmalak dan tur ruahmanna thlirin, kum kaltaa hnathawh thlir letna neih a nih tur thu a sawi a. Aizawl DC Pu Kanan Gopinathan pawhin Aizawl District huamchhunga hlawhtlinna chhinchhiahtlak an neihte tarlangin chung zingah chuan Aizawl District ODF a puan theih a nih tawh thu te, Theihai Luia lei dawh zawh fel a nih thu te, Energy Efficiency Services Limited (EESL) nena tangkawpin North Khawlek, Daido leh NE Tlangnuamah LED light bulb pek an nih thu leh Darlawn khuaah ATM hawn thar a nih thu te a tel a ni.
January atanga April, 2017 chhung khan Aizawl District huam chhungah Mahatma Gandhi National Rural Employment Guarantee Act (MGNREGA) hnuaiah Central leh State atangin fund cheng nuai 1,276.92 hmuh a ni a, heng sum te hi a vaiin hnathawh nan hman zawh fek a ni. Aizawl District ah block 5 leh zone 2 a awm a, hna 298 thawh tawh niin heng hnate hi zawh fel nghal zel a ni a. Mi 26,571 te inhlawhna siamsak an ni.
IAY/PMAY-G ah tun quarter chhung hian cheng nuai 55.95 dawn a ni a. Heta tang hian cheng nuai 55.032 (98%) chu Aizawl District huam chhungah in 70 sak tanpuina atan hman ral a ni a. Integrated Watershed Management Programme (IWMP) hnuaiah tun quarter chhung vekin cheng nuai 694.1501 hmuh a ni a. Heta tang hian cheng nuai 286.46738 chu hnathawn nan hman ral a ni. Aizawl District huamchhungah project 24 awmin, project implementing agency hrang hrangin an enkawl a. Heng fund atang hian watershed area 3306.51 hectare a zauah hnathawh niin tui dahkhawlna siam nan te, horticulture/afforestation kaihhnawih hna thawh nan bakah self help group din nan leh tihchangtlun nan hman a ni.
Shyam Prasad Mukherji Rurban Mission (SPMRM) hi Aibawk RD Block-ah siam niin cheng nuai 134.97 hman ral tawh a ni a, component 5 huamchhungah hna 16 thawh nan hman a ni. National Social Assistance Programme (NSAP)-ah cheng nuai 1259.19 dawn tawh niin cheng nuai 1104.36 hnathawh nan hman ral a ni a. Integrated Child Development Scheme (ICDS) atan cheng nuai 5882.93 dawn tawhah cheng nuai 5556.02 chu hnathawh nan hman ral tawh a ni.
Swachh Bharat Mission (Grameen) ah cheng nuai 174 atangin cheng nuai 52.39 hnathawh nan hman a ni a. Aizawl District huamchhungah inthiarna hmun riatah siam mek a ni. SSA hnuaiah sum cheng nuai 1113.8686 hmuh tawh niin 99.19% hman ral a ni tawh a, mid day meal atan sum cheng nuai 250.519 atangin 96.33% chu hnathawh nan hman ral tawh a ni bawk. Mizoram atangin pre-matric Minority Scholarship diltu mi 70,042 an awm a, pawl 11 atanga a chung lam zawng zirlai zingah diltu 1,995 an awm bawk. Sawrkar laipui Ministry of Minority Affairs-in pre-matric ah Mizoram quota a siam zat chu 11,971 niin post-matric ah 1,995 a ni a, hei vang hian diltu zingah hmulo engemawzat an awm dawn tih meeting-ah hian tarlan a ni a. Tribal Scholarship erawh quota bituk a awm loh avangin post-matric tribal scholarship diltu mi 40,052 te chuan an hmu vek dawn a, heta tan hian sum cheng vaibelchhe 42.6 sanction a nih tawh thu tarlan a ni a. Pre-matric ah diltu 10,000 bawr vel awm mekin sum erawh sanction a la ni lo.
Vawiin meeting-ah hian Aizawl District chhunga constituency hrang hrang bialtu MLA te - Pu R.Romawia, Pu Lal Thanzara, Pu R.Lalrinawma, Lt.Col ZS Zuala, Pu RL Pianmawia, Pu Vanlalzawma, Dr.Ngurdingliana, Pu R Vanlalvena, Er. Lalrinawma bakah Aizawl Mayor Pu PC Lalhmingthanga leh sawrkar department hrang hrang hotute an tel a ni.
