DIRECTORATE OF INFORMATION & PUBLIC RELATIONS, Government of Mizoram, India

Mizoram Government Doctors' Association (MGDA) chuan vawiin khan an Annual General Conference vawi 35-na chu Aijal Club-ah an hmang a; Chief Minister Pu Lal Thanhawla chu Conference kharna inkhawm ah khuallian niin, 19th Annual MGDA Magazine a tlangzarh nghal. Inkhawm hi MGDA Vice President Dr. Chawngthanchhunga'n a kaihruai a ni.

Chief Minister chuan doctor hna chu a zahawmin a ropui a, chuvang chuan doctor ten hna an thawh hmasak ber dawn a thu an tiam, Hippocratic Oath chu an pai reng a, anmahni vawngtu a nih zel a duh thu te, mihring nun zah leh ngaipawimawh ber zel turin MGDA member kalkhawmte chu a chahin, mihring enkawl hna chu sum siamna ni lo se, a ti bawk. Mizorama nau piang thi zat leh nu nau chunga thi zat tam tak thin te a tla hniam ta zel chu doctor-te thawhrim zar a nih thu leh lawmawm a tih thu a sawi a. Hrisel tur chuan nun uluk a tul thu sawiin, Doctor-te chu mi enkawl dam mai bakah ei leh in a fimkhur leh zuk leh hmuam, ruihtheih thil laka filhim kawngah te midang zirtirtu leh entawntlak ni tel turin Chief Minister chuan a chah a ni.

Ram changkanna leh hmasawnna atan doctor-te an pawimawh thu CM Pu Lal Thanhawla chuan sawiin, competition a san zel avangin doctor zir a harsa in hautak telh telh a, chutihrual chuan Mizoramah healthcare inenkawlna tha leh changtlung zawk nei thei turin sawrkarin kawng hrang hranga hma a lak zel thu te a sawi a. Sawrkar hospital te thuamthat a tihchangtlun a nih theih nan khawl tha chi hrang hrang lei a nih mek zel thu te a tarlang a. Medical College MIMER din chhoh mek a nih chungchangah thil khirhkhan tak, mahse mamawh avanga buaipui ngai a nih thu sawiin, paltlang tur tam tak awm mahse Medical College changtlung tak neih duhna leh quality thalo neih hlauhna avangin fimkhur leh duhtui takin buaipui tur ang ang buaipui a nih zel thu a sawi a. College innghahna tur Falkawn Referral Hospital pawh changtlung tak tura cheibawl zel a nih thu a sawi bawk. Chief Minister chuan Sawrkar Doctor kalkhawmte chu rinawmna nen hna thawk zel tura chahin, sawrkar hna thawh chuan mahni duh ang nilovin, a chhawrtu sawrkar thu a awm ngai a nih avangin transfer and posting chungchangah pawh a chhawrtu thu awih mai zel tur a nih thu a sawi bawk.

MGDA Conference hi thuang thum a hman niin, thuang khatna leh hnihna hi an President Dr. C. Lalhrekima kaihhruaiin report ngaihthlak leh rorelna huna hman a ni a. Thuang thumna, Conference kharna inkhawmah hian kum kalta chhunga MGDA member pension a chhuak ta mi pali - Dr. Lalthanzuali, Dr. K. Lalsanga, Dr. VLMS Dawngliana leh Dr. HT. Phosa te chu thlahna thuziak leh pawisafai cheng singhnih theuh a thlah an ni a, nikum May ni 21 a boral ta Dr. T. Lalrochunga sunna hun hman a ni bawk. President Dr. C. Lalhrekima chuan thu sawiin, MGDA chuan Medical College MIMER nei tura Sorkarin nasa taka hma a la chu MGDA in lawmawm a tih thu te sawiin, member-te dik taka thawk turin a sawm a ni. Dr. C. Lalchhandama, MGDA General Secretary hnen atangin Annual Report ngaihthlak a ni a. Dr. Lalremliana, Executive Committee Member, MGDA chuan lawmthu sawiin hun a khar a ni.

Tun dinhmunah hian Mizoram sawrkar hnuaiah MGDA Service Rules thar ber angin Doctor post 406 a awm a, doctor 374 thawk mek an awm a ni.

Attachment