Nimin khan Pu John Rotluangliana Minister, FCS &CA, Tourism, Transport chuan a bial chhunga PMGSY hnuaia Rajivnagar to Andermanik, Km 2.76 cheng Nuai 460.91 senga laih tur chu a hmunah a tlawh a. Hei bakah hian Andermanik to N.Belkhai, Km 5.68 Cheng Nuai 1129.86 senga laih tur chu PWD hotute nen a hmunah an tlawh. Heng project te hi Tender chhuah tawh niin a ranglama thawh thuai beisei a ni.

Nimin Rajivnagar leh Andermanik khuaa public meeting neihnaah Minister chuan a bial chhunga Border Road Task Force (BRTF) hnuaia kawng chhe zual laite MLA Fund hmangin a rang thei ang bera hnawh that a nih tur thu a sawi.

April Ni 16-a Measles Rubbella Vaccination Campaign neih turah pawh an tu leh fate, thla 9 atanga Kum 15 hnuailam chu natna laka kan lo him zawk nan Vaccine laktir vek turin Mamit District leh a bial chhung nu leh pate Minister chuan a ngen nghal bawk a ni.

Pu Vanlalvuana, SDO, PWD W.Phaileng chuan thu sawiin NEDP Road maintenance fund 2018-19 hnuaia Rajivnagar to W.Kawnpui Cheng Nuai 80 sengin thuam that a nih tur thu a sawi. Hei bakah hian Sazek Lui Bailey Bridge chu NABARD hnuaiah Cheng Nuai 27 sengin siam a nih tur thu a sawi bawk.

SSA hotute leh SSA DPC atanga Official kalte, Tourism Department, Supply Department leh PHE atanga Minister tawiawmtute chuan anmahni Department zawn theuha an hmalakna leh an hmachhawpte mipuite hrilh hriatna hun tha tak an hmang bawk a ni.