Vawiin khan Urban Development & Proverty Alleviation Department Minister Pu Zodintluanga chuan a pisaah, Deendayal Antyodaya Yojana - National Urban Livelihood Mission (DAY-NULM) hnuaia hmalakna pakhat, Scheme of Shelter for Urban Homeless hnuaia Mizoram pumpui atanga Shelter Home thlanchhuah 24 te hnenah Operation & Maintenance fund a hlan.
Minister Pu Zodintluanga chuan, Mizoramah riahna tur leh enkawltu mumal neilo kan awm mangloh chhana lang chu mi inpe leh tlawmngai tak takten Shelter home siamin mahni sum leh hun zawng zawng senga khawtlang tan hma nasa taka la an awm vang hi a ni, a ti a, Operation & Maintenance Fund chu a scheme in a phut angin Shelter home te chuan tangkai taka an hman ngei a beisei thu a sawi a, he fund sem anih thei nana thahnemngai taka hmalatute chungah lawmthu a sawi bawk.
Pu Vanlalmawia, Joint Secretary, UD&PA in he hun hi a kaihruaia, Pi Malsawmdawngliani, State Mission Manager, DAY-NULM hnen atangin Operation & Maintenance Fund hman dan turte ngaihthlak a ni bawk.
Shelter for Urban Homeless scheme hian a tum chu khawpui chhunga zan riahna leh tawm hulna neiloa khawlai leh hmun remchang laia khawsa thin te riahna tur buatsaih sak a ni a. Shelter leh home kan neih hrang hrang, ruihhlo in a tihbuai enkawlnate, taksa leh rilru lama rualbanlo enkawlna hmunte, chhawmdawl nan he scheme hi her danglam a ni a, Shelter home 24 te hnenah cheng nuai 51.36, Operation & Maintenance Fund atan sem a ni.
