Nimin khan PWD Minister Pu Lal Thanzara chuan Mizoram chakkhai lakna kawngpui ber, National Highway -54 a, Aizawl-Kawnpui inkar kawng dinhmun leh he kawng thuamthat leh siamthatna atana hna kal lai mek te leh he hna thawktu contractor te hnathawh dan a en a. Minister hi PWD Engineer-in-Chief Pu Vanlaltluanga leh he kawng enkawltu National Highway Division-III SE Pu Lalruata leh engineer dangten an tawiawm a a ni. Helai kawng a enzawh hian Minister in Lengpui Airport Road a lei thuamchak mek hnathawh dan pawh a en leh bawk a ni.
Hunthar lei tlahniam atanga NH-54 dinhmun hi en tanin Kawnpui-ah an tawp a. He kawng dung (Aizawl to Buichali) chhe lai zual hmun 6 chuang-ah dingin, Minister leh PWD hotuten, he hna thawk tura thlan (Buichali to Aizawl) contractor chu heng hmun te hi ngaipawimawh hmasa turin leh fur hma ngeia a chhe lai zual te chu siam tha turin an hrilh a. Minister chuan contractor hna hi Work schedule duan ang ngeia an hna thawh an kalpui em tih te, bungrua, khawl leh hnathawktu an neih dante a phuphru tawk em tih te leh an hna quality te chu vil a, enzui reng turin amah zuitu PWD engineer rual, a bik takin he hna enkawltu National Highway Division-III a hotute chu a hrilh a. Mizoram chakkhai lakna kawngpui ber anih avangin fur hma ngeia a chhe lai zual te chu siam zo ngei turin contractor hi a hmunah a hrilh bawk a ni. Minister leh amah tawiawmtu te hian Buichali to Khamrang inkar kawng, Railway hnathawh avanga, leivung leh chirhin rawn tlawlh thla in side drain leh culvert a hnawh te an en leh a. Heng hmuna Railway hnathawh avanga kawng chhia leh side drain hnawh te chu Railway engineer a hmuna awm te chu haifai turin an hrilh a, an ti lo anih chuan he kawng enkawltu leh mawhphurna nei an nih angin FIR thleng an thehlut thei tih an hrilh a. Railway engineer te chuan a zualpui chu fur hma ngein an haifai tur thu an lo hrilh a ni.
NH-54 (Kawnpui - Aizawl section) hi Kawnpui to Khamrang (Chainage 118/00 - 133/00 KMP); Khamrang to Buichali (Chainage 133/00 - 147/800 KMP) leh Buichali to Aizawl (Chainage 153/00 - 183/00) ah te then a ni.
Kawnpui to Khamrang (Chainage 118/00 - 133/00 KMP) hi 2015 khan SARDP-NE Phase 'A' Package No. 1/54 hnuaia siamthat/tihzauh) a ni a, 2019-2020 ah Periodic Renewal hi tih a hun leh dawn a. Tunah hian NEDP sum cheng nuai 91.26 hmangin kawng khuar te chu Pot hole Repair kalpui mek a ni.
Khamrang to Buichali (Chainage 133/00 - 147/800 KMP) hi 2014 khan SARDP-NE Phase 'A' Package No. 2/54 hnuaia siamthat/tihzauh) a ni a. He lai kawng siamthat hna 'Strengthening, Profile correction and Redesigning of pavement from 133/00 - 147/800' hi March ni 12, 2018 ah sanctioned niin tunah hian tender stage ah a awm mek in, tender zat chu cheng vaibelchhe 31.58 a ni a. NEDP sum cheng nuai 161.07 hmangin tunah hian kawng khaur hnawh leh a chhe lai zual siam that hna hi kalpui mek a ni.
Buichali to Aizawl (Chainage 153/00 - 183/00) hi 2013 khan a chei that Periodic Renewal hna zawh niin he kawng defect liability period hi 21/1/2016 khan a zo a. Tunah hian Periodic Renewal thar hi tan a ni leh ciah a. He hna hi vaibelchhe 25.56 hu man niin M/s MB-BKA(JV) Assam in an thawk tan a. Helai kawng a repair nana lung te hi Assam atanga phurh chho mek niin nimin khan Hunthar lei tlahniam atangin hna an tan a ni.
