Mizoram Government Drivers Association kum sawmnga tlin, Golden Jubilee lawmna vawiina Synod Conference Centre a neih ah Chief Minister Pu Lal Thanhawla chuan a hmanpui.

Chief Minister chuan khawvelah hna hnuaihnung leh hna sang bik awma a hriat loh thu sawiin, kuthnathawktute hlei hlei hi an pawimawh a, an hna hi khawvela hna zahawm ber a tling a ni a ti a. Driver-te chu an pawimawhna hriaa, an hnathawh chu Pathianin a dahna a ni tih pawm a, rinawmna, taimakna, dikna leh Amah tihna nen tui taka thawk turin a chah a. An pawlin sorkar hotu pawimawhte an hmuh dawna tawngtaina an hmang hmasa thin chu fakawm a tih thu sawiin, thil an dilna kawngah sorkar thu leh hla ngaihchan hmasak an ching thin chu a chhuanawm hle a ni a ti a.Chief Minister chuan Driver-te chu an hlawh hmuh ang zela khawsak thiam tura chahin, kan phak baka khawsak kan tum hian harsatna namenlo kan tawng baw thei a ni a ti.

Chief Minister chuan sorkar Driver-te chu sorkar neitu dik tak an nih angin, sorkar ding apiang chu rinawm taka thlawp zel turin a chah a. Mizoram darthlalang an ni tihte inhria a, kan mikhualte kaihhruai dante thiam thin turin a chah bawk a ni. An hna pui ber motor khalhah englaipawha fimkhur tur leh an mi phurhte himna ngaipawimawih hmasa tura chah bawkin, ruihtheih thilah fihlim tlat turin a chah nawn bawk a ni. MGDA ten Golden Jubilee lawmnaa tel tura state danga an anpui pawl hruaitute an sawm chu a nachang hriat thlak hle a, a lawmawm takzet a ni a ti.

AMC Licensing Regulations chungchang a sawiah Chief Minister chuan Law Department-in vawi hnih an en tawh a, Law Commission-ah pawh pek a nih tawh thu sawiin, hlauh tur a awm loh thu an sawi a ni a ti a. Heti chunga pisa kai tur dan hian nghawng thalo ati chhuak thei a, hei hi kan tawrh vek tur a ni a ti.Zu chungchang sawi bawkin, Pathian rawn chung zela kal an nih thu a sawi a, rilru fim tak chunga ngaihtuahna hmanga kalin, ‘kan ar khawthim dai mai mailo a ni’ a ti a. Zu in lo theilo ten zu tha an in theihna tura kan enchhinna a ni dawn a, a thalo anih chuan kan titawp leh mai ang Pu Hawla chuan a ti.

Chief Minister hian MGDA Golden Jubilee hriatrengna souvenir a tlangzarh a, hriatrengna lungphun a hawng bawk a ni.

Golden Jubilee hmanpui tur hian All India Govt Drivers Federation President leh O/B dangte, state dang Maharashtra, UP, Delhi, Haryana, Nagaland, Manipur, Meghalaya leh Assam atanga Association hruaitu engemawzah an lokal a, Maharashtra Chief Minister hnen atanga thuchah a neih chhiarchhuahna te neiin, MGDA bakah heng state dang Association te hian Chief Minister hnenah duhsakna thilpek an hlan hlawm bawk a ni.

Chawhma inkhawm hi MGDA Vice President Pu R.Lalhmunmawia’n a kaihruai a,chawhnu lamah lawmna programme hman chhunzawm a ni.