Vawiin khan Home Minister Pu R.Lalzirliana chuan Central Training Institute, Sesawng a 11th batch Jail Warder traning zo te passing out parade a hmanpui a. Training chhuak te hi an zavaiin mi 41 niin traning chhunga titha zual thlan chhuah mi 4 chuan Home Minister leh Parliamentary Secretary Lt Col(Rtd) Z.S. Zuala te hnen atangin chawimawina thuziak leh lawmman an dawng a ni.

Passing out parade a thusawitu Home Minister Pu R.Lalzirliana chuan Jail Warder training chhuak ta te chu India danpui leh hnam puanzar hnuaia an thuthiam te chu nghet taka vuan tlat turin a chah a. Thil diklote leh dan bawhchhiatnate chu hleih neilova huaisen taka do ngam turin a chah. Home Minister chuan Kan ram chhunga mi tam zawk te sakhaw vawn leh rinna ah chuan roreltute a kan thlan chhuah te hi Pathian ruat an ni tih chiang takin a inziak a chutah chuan rinna kan nghah a ngaih thu leh roreltute chuan an rawngbawl sak mipuite tan thil thalo an duang chhuak dawn lo a ni tih ah hian kan chian a ngai tel a ni a ti. Tunhnai ah pawl tam tak sawrkar dodal zawnga khawsa leh mahni a thuneihna inpe chawpin an dan siam chawp te an kengkawh a, heng mite hian dan an bawhchhia a ni tiin in enfiah se a lawmawm tur thu a sawi a.Lemchang nun hi tihtawp a hun a, Kristian-na hmai kawr phena diklo taka roreltute dodal leh mipuite thu diklo hrilh chiam mai hi thil tenawm a ni a ti a. Kan awmna hmun apiang ah te leh kan eizawnna hna kan thawhna kawng tinrengah te kan sakhaw rin zirtirna mil a thianghlim taka kan khawsak chuan kan dingchhuak anga tun aia nasa in hma kan sawn ngei pawh a rinawm a ni a ti.

Jail Warder passing out parade programme hi Pu Lalrengpuia, Commandant, CTI Sesawng in a kaihruai a, Pu Lalhruaia, Commandant General, Mizoram Home Guards leh Pi Zoramthangi, IGP, Prisons te pawh he hunah hian an tel a ni. Training chhunga titha zual thlanchhuahte hi - Best all rounder P.C.Biaklarkima, Best firer Vanlalhmangaihzuala, Best drill Lalremruata leh Best written Rinsangpuii te an ni.