267/2025-2026

Aizawl, the 22nd April, 2025: Vawiin khan Chief Minister Pu Lalduhoma chuan Vanapa Hall-ah Mizo Hmeichhe Insuihkhawm Pawl (MHIP) General Assembly Vawi 24 na chu a hmanpui.

Chief Minister chuan, MHIP hian mipuite zirtir leh rawngbawl hna a thawk nasa thin a, Swardhar Greh leh One Stop Centre kan kalpui theihna kawngah te a thawh hlawk hle. Ka bial, Serchhip district-ah chuan Sub Headquarters MHIP ten Swardhar Greh enkawl hna hi an thawk thin a, Beti Bachao Beti Padhao Scheme kalpuinaah sawrkar an thawhpui tha thin hle. Fahrah chawmna in “Hmangaihte Run” in nei a. Dan ang thlapa fa lak pawh kalpuiin, in zarah fahrah tam tak ten nu leh pa an neih phah a ni. In hnathawh that avangin kum 2016 khan Ministry of Women & Child Development, Government of India, chuan Nari Shakti Puruskar lawmman a hlan che u a nih kha.

Hetianga ram leh khawtlang tana hnathawk thin pawl tangkai tak a nih avang hian MHIP hi ka ngaihlu a. Kan sawrkarin hmeichhiate kan ngaihsakzia kan tihlanna langsar tak pakhat chu, a hmasa ber atana hmeichhe Cabinet Minister kan nei hi a ni. Tha taka in lo thawhpui kan beisei. Mizoram hi India rama hmeichhiate dinhmun that berna zinga mi a nih a rinawm a, kan hmeichhiate hi kan state thawhchhuahah in inrawlhthuk hle.

Kan hnam nunphungah hmeichhiate hi zah taka enkawl in ni thin a, a tilang chiangtu chu kan tawng kauchheh hi a ni. Tunah phei chuan kawng tam takah mipate pawhin kan tluk tawh lo che u a ni. Amaherawh chu, mipate rorelna hnam kan ni a. Chhungkuaah hmeichhiaten an pasalte thu an ngaichang thin tur a ni. Thutawp siamna chi reng reng chu Pa kut a ni. Pasal nikhua lo tak, rawn tlak ngang loh in nei a nih ngawt loh chuan nuin chhungkuaah rorel lo tum suh u. In pasal te kha finchhuah ula, an mawi lohna laite hliahkhuhin timawi zawk rawh u. Chu chu nupui tha zia a ni. Zo nun ze mawi a ni satliah lo va, Pathianin nupuite awm dan tura a ruat a ni.

Khawtlang thlun nghehna thirchakai chu chhungkua a ni a. Chhungkaw tha kan din phawt chuan chawp leh chilhin khawtlang tha kan nei nghal thin. Fapa tha pakhat min hrinsak vangin kan ram leh hnam hian a thatpui hawk thei. Chutiang bawkin, fa nikhua lo pakhat vangin, a hnam ang te, a ram ang tein kan mualpho thei bawk.

Hmeichhiate ngaihsan zawng milin mipa hi kan nung mai thin. Huaisen in ngaihsan chuan mipa zawng zawngin ‘huaisen’ kan tum mai a, hausa in ngaihsan chuan, a dik emaw dik lo emaw thlu lo va hausak kan tum leh mai ang. Ngaihhlut tur dik tak lo ngaihlu ula, in sukthlek hmangin kan hnam hi thui tak in kaihruai thei tih lo hre reng ang che u, a ti a. MHIP leh tlawmngaipawl dangte chu mahni pawl thil te, Pathian thil leh Kaisara thil te thliar thiam turin a chah a. Kan hmalakna tur awm tak hi a awm a, midangte hmalakna tur awm tak pawh hi a awm mai. Engkimah inrawlh tum lo vang u, tiin a chah a. An kal zelna turah duhsakna a hlan a ni.

Pi Ngurmawii Sailo, President, pawhin thusawiin, Assembly palaite leh khuallian, Chief Minister chungah lawmthu a sawi a. MHIP hian kum 50 a tling ta a, kum 50 chhunga kan hruaitu lo ni tawh zawng zawngte kan hre reng a. An kawng lo sial tawhah, pawl thiltum tihlawhtling tura, tumah thlei bik nei lo va kal zel hi kan tum a ni, a ti. MHIP hian nikum July thla khan an kum 50-na an lawm tawh a ni. General Secretary Pi Lalliani report danin - MHIP hian Sub Hqtrs 10, Block 30, Joint MHIP 9 leh Branch 765 a nei a. Member hi nuai hnih, sing riat sangkua leh za thum (289300) vel an awm mek.

Assembly hawnna inkhawm hi Pi B. Sangkhumi, Vice President-in a kaihruai a, Pi Ronguri, W. Phaileng chuan hunserh hmangin, thusawi leh report te ngaihthlak a ni a. Padma Shree Pi B. Sangkhumi, Mizo hmeichhiate hamthatna tura thawktu, kum sawm thum zet MHIP kaihhruaina lo thawk tawh hnenah chawimawina an hlan a. Art & Culture department lamin awareness campaign an nei bawk.

Chawhnu lamah rorel inkhawm an nei a, naktuk lamah central YMA ten inthlanna an neihpui thung dawn a ni.