267/2025-2026

Khawzawl, dated 22nd April 2025: Chawlhkar hnih chhung awh - nu leh naupangte tana chaw tha ei pawimawhzia inzirtirna Poshan Pakhwada kharna leh Anganwadi enkawlna kawnga VC te tana an mawhphurhna inhrilhhriatna hun chu Khawzawl ICDS Project bultumin vawiin khan Khawzawl Vengthar YMA Hall-ah neih a ni a, he hunah hian Khawzawl ICDS Project hnuaia thawkte leh Khawzawl khawpui chhunga Village Council 10 leh Hmuncheng, Arro Village, Neihdawn leh Chawngtlai khua atangtein VC Member te an tel a ni. 

He hunah hian CDPO Pi Esther Laltlinpuii chuan thu sawiin Anganwadi tinah hian Coordination Committee din a nih thu leh Coordination Committee kaltlangin khawtlang mipuite nen Anganwadi enkawlnaah thawhhona thatak neih thin a ni a ti a. Anganwadi saknaah leh a enkawl chhunzawm zelnaah te pawh sum hmuh tam lo mahse khawtlang mipuite thahnemngaihna zarah tha takin hnathawh a ni thin tih a sawi a. VC Member te chu Coordination Committee a tel an nih angin Anganwadi enkawlnaah leh hmasawn chhoh zelnaah mawhphurhna an nei lian hle tih sawiin an chhuah vahnaah Anganwadi te a nih tur ang takin kalpui an ni em tih te endik fo turin a chah a. Co ordination Committee te chu Anganwadi Centre tlak balna lai te, khuarel chhiat tawh palh chang te a, a thawm that leh siamthat thu-ah te pa chan chang turin a ngen a. CDPO hian Anganwadi Centre pawimawhna leh hnathawh te, nu, naupai leh naupangte tana an hmalakna te a tarlan bakah Poshan Pakhwada hnuaia Programme an buatsaih te a tarlang bawk.

Vawiin tlaia Khawzawl ICDS Project in Programme an buatsaih hi C.O. Pi Zoramthangi chuan a kaihruai a, CDPO Pi Esther Laltlinpuii bakah C.O. Pu Lalrinsiama chuan Coordination Committee mawhphurhna te VC kalkhawmte hrilhhriatna a nei bawk a ni.