Chief Minister Pu Zoramthanga chuan vawiin khan Mizoram Horticulture Service Association General Conference 23-na chu Aijal Club ah khuallian niin a hmanpui. Horticulture Development Board Vice-Chairman Prof. F. Lanunmawia leh Bamboo Development Board Vice-Chairman Dr. K. Pachhunga te chu khualzahawm an ni a. Addl. Chief Secretary Pu J.C. Ramthanga chu khual sawm bik a ni. Conference thupui atan “Bamboo for economic prosperity” tih thlan a ni.

Chief Minister chuan thu sawiin Mizoramin hma a sawn theih nan malsawmna kan dawnte hi a nih ang tur taka hman a dinchhuah pui chu tuna kan tih tur a ni, a ti a. Kan ram a in a neih sa leh kan ram a tha thei tih kan hriatchian sa te hmanga ram tihhmasawn a pawimawh thu a sawi. Chief Minister chuan a hmasa berah chuan buh ah leh thlai leh thei rah ah te intodelh in, sangha leh ranvulh lamah hmasawn bawkin, a chhunga chengte chu inchawmzo tura hmalak a pawimawh thu a sawi a. Chumi atan chuan lo leh leilet ah pawh chemical fertilizer leh insecticide hmang lovin organic farming sytem a kal a, hriselna atana tha thei tur ang ber a hmalak a pawimawh thu a sawi.

Chief Minister chuan ei tura intodelhna chauh chu a tawkloh thu sawi bawkin, a hlawm lian, large scale a tharchhuah a, hralhchhuah theih tur thei kung leh thingkung hrang hrang tihhmasawn tura hmalak mek a nih thu a sawi. Chung zingah chuan ram pum hmun tin a tha thei vek kan neih chu mau a nih avangin Bamboo development programme pawh hi kalpuiin, a hlawhtlin theih nan theihtawp hma kan la zel a ni, a ti. A hman theihna a tamin ahlawkthlak a, environment tan pawh a hrisel a, a lo len tawh hnu chuan enkawl ngailo, hautak lo tak a nih avanga kuthnathawktute tan pawh a awlsam thu khuallian chuan a sawi a. A tir te, a chi phun a tihnun lai tak chu hun khirh lai ber leh uluk ngaih lai ber a nih avangin inzirtirna ptha tak pek a pawimawh avangin Horticulture officer leh thawktute chu an pawimawh thu a sawi bawk a ni.

Horticulture Development Board Vice-Chairman Pu F. Lanunmawia chuan Mizoram sum a tam thei ang ber hum a nih theih nan thei leh thlaia intodelh a tul thu a sawi a. Thei leh thlai tharchhuah a lo pun theih nan technology tha, thiamna thar zawk te kuthnathawktute hnena hrilhhriat a, kaihhruai a pawimawh thu sawiin, chumi atan chuan hoticulture officer leh thawktute an pawimawh thu a sawi. Pu F. Lanunmawia chuan kuthnathawktute an lo hlawk zawk theih nan thei leh thlai quality tha zawk te a remchan dan anga zawi zawia lak luh dan ngaihtuah tha a tih thu a sawi bawk a. Bamboo plantation kalpui tan mekah pawh hlawhtlinna tam tak hmuh ngei a rin thu sawiin, hlawkthlak thei tur ang bera horticulture hnuaia hmalakna hrang hrangte chu kalpui a nih a beisei thu a sawi.

Bamboo Development Board Vice-Chairman Pu K. Pachhunga chu horticulture officer kalkhawmte chu mahni hnaah thahnemngai taka thawk zel tura chah in, mahni hna a rinawm taka a thawh chuan an zahawm thu a sawi a. Mizoram bak chu tuna awm mekte leh kan tu leh fa te tan hemi lo ram dang kan neih loh avangin ram tan mani zawn theuh ah theihtawp kan chhuah a, rinawm taka kan thawh a pawimawh a ni, a ti a. Rinawmna leh zahawmna chu thil hlu tak, mahni mimal a innghat a nih thu Pu K. Pachhunga chuan a sawi.

Addl. Chief Secretary Pu J.C. Ramthanga chuan thu sawi bawkin, Mizoram chu ram chhengchhe tak a nih avangin horticulture chu ei leh bar a intodelhna tur atana pawimawh a ti thu a sawi a. Mizoram economy khaikhana tura hmalakna liantham awm theihna kawng a neih that ber chu horticulture a nih avangin department a thawktu te kutah thui tak a hlawhtlinna a inngah thu Horticulture Secretary chuan sawiin, theihtawp chhuahpuiah a awm a ni.

Vawiin inkhawm hi MHSA President Pu Vanlalnuntluanga Renthlei chuan kaihruaiin, General Secretary Pu B. Lalzarzova hnen atangin report ngaihthlak a ni a, Dr. Robert Lalrinsanga, HDO(V) hnen atangin theme chungchang presentation ngaihthlak a ni. Chief Minister ho a hun hman zawh hian thupui sawihona leh thurel a hun hman chhunzawm a ni a. Horticulture Director Dr. Elizabeth Saipari chuan MHS Directory a tlangzarh a ni.