Vawiin chawhma khan Press Club, Kolasibah Mizoram Journalist Association, Kolasib District te chuan Annual Conference 2020 a nei a, Pu K Lalrinliana, Minister of State, Food, Civil Supplies & Consumers Affairs department chuan Khuallian a ni.

Khuallian Pu K Lalrinliana chuan Chanchinbumite chu sawrkar leh khawtlang tan a mi tangkai, hmasawnna, hmalakna leh thil tul pawimawh tak tak puangzartu an nih thu sawiin Chanchinbumi an nih angin zalenna thui tak an neih thu a sawi a. Ram leh khawtlang tan a thu tangkai leh puanzar tul a an hriat te chu belhchian dawl leh thu dik a nih phawt chuan huai tak a phochhuak zel turin a chah bawk a ni. District hmasawn nana Kolasib Journalist te hma lo lak tawh thinnaah leh Kolasib district a Journalism a hma hruai tute leh tun a member thahnemngai tak tak te zarah Kolasib district-ah Journalism lamah hmasawnna nasa tak a awm chu lawmawm a tih thu a sawi. Chanchinbu tihchangtlun kawng a hmalak theihna kawng hrang hrangte tarlangin Khuallian chuan Kolasib Press Club sak puitlin a nih theih nan hma a lakpui tur thu a sawi bawk a ni.

Pu R Lalhmingthanga, President, MJA Kolasib chuan MJA, Kolasib district te hnathawh dan leh hmalakna hrang hrangte tarlangin Kolasib district chhungah Chanchinbu 12 a awm thu leh chung zinga 11-te chu Nitin chhuak leh 1 kartin chhuak a awm thu a sawi. Pu R Lalhmingthanga chuan MJA member te tan Journalist Ethics vawn tlat a pawimawh thu sawiin, ngaihtuahna fim tak hmang a, thil nihphung leh kalhmang dik zawk bihchiang peih mi ni turin leh kan chanchinbu enkawlna kawngah pawh ram leh khawtlang tan a kan tangkaipui tur leh kan thattlanpui tur ngai pawimawh hmasa thin turin a chah bawk a ni.

MJA Annual Conference 2020 chawhma hun hi Pu Andrew VL Auva, Vice President, MJA Kolasibin a kaihruaia, chawhnuah rorelna hun neih niin DIPRO, Kolasib kaihhruaina hnuaiah kum 2020-2022 atan a hruaitu thlanna hun neih a ni bawk a ni. Kum 2020-22 atan a MJA Kolasib district President atan Pu R Lalhmingthanga, Vice President Pu Andrew VL Auva leh Treasurer atan Pu C Zomuanpuia thlan an ni a, Executive member 5 thlan an ni bawk.

Kum 2020 - 2022 chhunga Kolasib District MJA hruaitute

President Pu R. Lalhmingthanga, DDK
Vice President Pu Andrew VL Auva, Editor, Kolasib Today daily/PTC, AIR
Treasurer Pu C. Zomuanpuia, Editor, Kolasib Aw daily

Executive Member
1) R. Lalnunmawia Jt Editor,Duhlai daily,
2) PC Zairemthanga, Editor, Zoram Kanaan daily, Bilkhawthlir,
3) Zairemchhunga, Editor, Bahzar weekly,
4) C. Lallawmzuala, Vairengte Aw daily, Vairengte,
5) H.Lalmuanpuia, Editor, Chhuahtlang daily, Kawnpui.