International Paragliding Accuracy Championship 2020, Serchhip-a neih tur inbuatsaihna kal zelah naktuk hian Tandem Pilot thenkhat te Mizoram an lo thleng dawn a. February ni 3 atang hian he event neihna tur hmun Serchhip Chuanhnuaiah mipui a duh apiang tan man chawiin Paragliding Pilot te kaihhruaina hnuaiah Joy ride a tih theih tawh dawn a ni.

Vawiin khan International Paragliding Accuracy Championship 2020 Organising Committee chu an Chairman Pu Robert Romawia Royte, Tourism leh Sports changtu Minister hovin a pisaah an thukhawm a. Sub Committee peng hrang hrang aiawhte leh member ten an hmalak dante an sawi a ni.

Tun dinhmunah ram hrang hrang atangin pilot 60 vel he event-a tel tur hian an inziak lut tawh a. Hriat theih chinah South Korea, China, Afghanistan, Kazakhstan, Slovenia, Macedonia atang te in official leh pilot tel tur an inziaklut tawh a ni. Slovenia atangin Chief Judge a lo kal dawn a. India rama aero sport-a thuneitu sang ber Aero Club of India, National Aero Council President leh Secretary General te pawhin he Championship hi chhim an tum a ni.

February ni 11 ah a tel tur zawng zawng ten Serchhip an thleng kim ang a. Hawnna programme hi Serchhip Tourist Lodge ah February ni 12 hian neih a ni ang a, February ni 15 tlaiah kharna inkhawm hi ropui taka neih tum a ni.