Chief Minister Pu Lal Thanhawla chuan Mizoram politician hlun leh hruaitu hmasa, nimin a chatuan ram panta, Minister hlui Pu Zakhu Hychho chho chu a ui thu leh a kalsan tak, a nupui fanaute a tuarpuina te lehkha a ziak in Pu Zakhu Hlycho nupui, Pi Suipari a thawn.

Chief Minister chuan, Nimin nilaini September ni 6-a Chief Minister Conference Room-a Autonomous District Council pathum Chief Executive Member te leh an thawhpui te leh Chief Secretary, Mizoram Sorkar Secretary rual te leh hotu pawimawh ten inkhawm pawimawhtak an neih laiin Pu Zakhu Hlychho thih thu a  hre thut chuan a  thin a thawng hle hle a, pawi a tih takzet thu a sawi a.

"Pu Zakhu hi kan ram hruaitute zingah mi pawimawh tak a ni a, hmun pawimawh tak tak, Minister nihna hial lo luah tawh a ni a. Pa tha, rilru ngil, kawm nuam tak leh zaidam tak a a ni. Sorkar-ah Minister ni a kan thawh ho lai pawhin thawhpui nuam tak a ni a, ram hmasawnna ngaihtuah mi a ni. Thawhpuite zah thiam, an thu leh hla ngaichang thiam, chawimawi thiam tak a ni", a ti a.

"Hetiang mi pawimawh tak kan chan ta mai hi channa rapthlak tak a ni a, a uiawm takzet a, hmun awl a siam hi hnawhkhah leh a har ngawt ang", ti a sawiin Chief Minister Pu Lal Thanhawla chuan Pu Zakhu Hlycho in a kalsan tak a nupui fanaute leh a then leh rualte zawng zawng te chu thinlung takin a tuarpui tih a tarlang a ni.