Nizan khan Conference Hall, Berawtlang Tourist Complex-ah Chief Minister Pu Lal Thanhawla chuan 4th Annual Conference of Indian Society of Radiographers and Technologist(ISRT) a hmanpui.

Chief Minister Pu Lal Thanhawla chuan tunlai thiamna hmanga damlo enkawlna khawl te tangkai zawka hmang thei zel turin Radiographer te leh Technologist te'n dinhmun pawihmawh tak an luah thu a sawi a. An hna leh mawhphurhna te tha taka an hlen theih nan intathriam chhunzawm fo tura chah in damlo te hnenah Radiology hmanga inentirna tangkaizia te leh hriselna kawnga a kaihhnawih thil awm thei te pawh tlang taka an sawifiah thin pawh a ngai a ni a ti.

ISRT  chu pawl naupang tak ni mahse, hriselna mipui te hnena thlenna kawngah hna pawimawh ber ber thawktute intelkhawmna a ni a ti a. Pawl pawimawh tak nia a hriat thu leh Mizoramah an khawmpui vawi-4 na an nghah avanga lawmawm a tih thu a sawi a. ISRT in anmahni puala thlakip chhuak emaw kum khat chhunga vawihnih thum chhuak, Magazine te chu Mizotawng a lehlin ve thin ni se; mipui tana pawimawh zual deuh te phei chu Health Department tihchhuah thin, 'Hriselna' Magazine-ah chhuah thin nise mipui tan a hlawk hle ang a ti.

Chief Minister chuan damdawi lam thiam leh damdawi ina thawk te chu an hna chanpual te an thiam a tul bakah hriselna chungchang mipui hnena puanzar leh tlangaupui pawh an mawhphurhna ni tel tho a a hriat thu a sawi a. Mizoram, mipui nuai sawmpakhat bawr vel lek chennaah phei chuan hmalak a har loh thu leh Health Mission hlawhtling taka kalpui pawh, a thawktu zawng zawng an inpumpek tak tak chuan thil harsa niin a lang lo a ti.

4th Annual Conference of Indian Society of Radiographers and Technologist(ISRT) hawnna inkhawm hi Dr.M.Sarmah, Chairman, Organizing Committee in mikhual te lawmna thu a sawi hnuah tan a ni a. Pu Suresh Malayath, General Secretary, ISRT in report pe in thusawi, Dr. Chawngthanliana, Director, RIPANS, Pu A.Selvakumar, President, ISRT leh Pi Rebecca Lalhlimpuii, Organizing Committee te hnen atangin ngaihthlak a ni.

He hunah Chief Minister Pu Lal Thanhawla’n ISRT khawwmpui pual atan bika Magazine buatsaih leh ISRT in Magazine a buatsaih, ALARA chu a tlangzarh a. Khuallian Chief Minister chuan RIPANS atangin Mizoram Chief Minister’s Relief Fund atan sumfai Cheng singnga a dawng a; ISRT pawh in Mizoram Chief Minister’s Relief Fund atan cheng singhnih an hlan bawk a ni. Nizan khan mikhual thleng tawh 150 bawr vela wm tawh in an thlen belh tura beisei a ni a; ISRT khawmpui hi naktukah a tiak ang.