India ram District 604 (Census 2011) zinga ziak leh chhiar thiam (literate) tamna ber; Serchhip District DIET Conference Hall ah vawiin hian International Literacy Day, 2017 hman a ni a, District Bawrhsap Pi Sangchhin Chinzah chu khuallian niin, sawm bik kal khawm ten Literacy rate sang ber District nih chhunzawm zel theih dan tur an sawi ho. 

Khuallian Pi Sangchhin Chinzah chuan, Mizote vanneihna em em chu Missionary ten Roman Script hmanga Alphabet min siam sak leh zirna ngaipawimawh sakhua, Christian kan nih vang a ni, a ti a. Kristian kan nih hma kum tam tak chhung leh kan nih hnu kum reilote chhung khaikhin pawhin kan danglam zia a lo lang, tunah phei chuan India rama mipui nawlpui changkang ber pawl kan ni hial awm e, a ti. India rama ziak leh chhiar thiam tamna ber nih chu chhuan tham a nih rualin, a taka chhawr tlak, hman tlak mithiam chherchhuahna lamah erawh hmabak kan la ngah thung hle a ni, a ti a. Zirna hian a tha zawngin kan nun a nghawng tur a ni a, mi nghet leh rintlakah min chhuah tur a ni. Tun hma deuhva Central Service nei thei tak State kha kan tlachhe nasa ta hle mai, hei hi zirna lama thawktute tan chona, hmachhawp hlen ngei tur chi nia a hriat thu a tarlang bawk. 

He inkhawm kaihruaitu Pu Lalrammawia, Principal, DIET chuan International Literacy Day lo chhuah dan tlangpui tarlangin; United Nations peng pakhat UNESCO chuan November ni 17, 1965 khan International Literacy Day chu kum tin September ni 8 a hman a rel a, 1966 atanga official taka hmang chhovin ram tam takah hman a ni tawh a ni. 2006 atang khan Thupui neiin he Day hi hman tan a ni a, kumina Day thupui chu “Literacy in Digital World” a nih thu a tarlang a ni. 

He hunah hian Pi Vanlalhruaii Thangluah, Lecturer, DIET chuan “ Literacy Day, History, Issues & Challenge” tih thupui hmangin kalkhawmte zirtirna a pek bakah Pu Lawmawma, DEO, Serchhip pawhin International Literacy Day chungchang leh Serchhip District chhunga Literacy san zel nana hmalak dan sawifiahna hun a hmang bawk. 

Hemi hnu hian kal khawm ten Serchhip District chu Literacy Rate sanna ber District a nih zel theih dan tur leh mi hmantlak, mithiam chherchhuah lama hmalak dan tur pawimawh nia an hriat te sawi hona an hmang zui a. Census 2011 in a tarlan, Serchhip District a ziak leh chhiar thiam lo mi 805 la awm nia hriat te zawn chhuah leh zirtir dan tur ruahmanna te neih nghal a ni. Census 2011 in a chhinchhiah danin Serchhip District ah mihring 64875 awmin an zinga mi 55102 chu ziak leh chhiar thiam an ni a, mi 805 te chu illiterate an ni thung. Ziak leh Chhiar thiam hi za zel a 95.18 ang niin mipa bik 99.24 a ni a, hmeichhiah chu 98.28 a ni thung a ni. 

Vawiina International Literacy Day ah hian MJA, YMA, Serchhip Teachers’ Association leh MZP aiawh te, Serchhip District Academy of Letter (SEDAL) aiawh te, zirna in Principal te bakah sawrkar lam atangin DRO, DIPRO, DEO leh Serchhip DIET thawktu zawng zawng te an tel a ni.