Vawiin khan Lal Thanhawla Auditoriumah 32nd National Fortnight on Eye Donation programme ( 25th Aug – 8th Sept,2017 ) kharna Health Minister Pu Lal Thanzara hovin hman ani a.A mamawh te tana phal taka an mit petu te hnenah appreciation Certificates te hlan nghal ani.
Eye Bank neih hnu kum 2009 September ni 25 khan Mizorama a hmasa ber atan mit thlak ( Corneal Transplant ) chu hlawhtling takin Civil Hospital,Aizawl a Eye Department leh Sri Sankaradeva Nethralaya ( SSN) Guwahati nena tangkawpin neih a lo nih tawh dan sawiin khuallian Pu Lal Thanzara chuan mahni ramah ngei Organ Transplant ( taksa peng thlak ) tihtheih a lo ni ta chu hmasawnna duhawm tak,mi harsa zawkte tan pawh kawtkaia tih theih mai anih avangin a lawmawm hle a, Health Department a Eye Department te hmalakna faktlak anih thu leh hemi lama mipuite pawh than harh deuh deuh a tul thu a sawi.
Lawngtlai District tih lovah chuan District 8 zingah mit lama inenkawlna Eye Ward,Eye OT a awm vek tawh in heng hmun ah te hian Sorkar chuan Eye Surgeon dah thei zel tur tur pawha tan a lak nasat dan leh hengte hi a hlawhtlin theih hunah chuan Eye Donation lam pawhin hma sawnin Eye Donation Centre te pawh District tinah neih thuai a beisei thu te,Mit Donate duh tan pawh kawng a inhawn zau belh zel a rintlat thu Health Minister chuan a sawibawk.
Eye Donation hi Organ Transplant theih zingah chuan a awlsam ber leh hlawhtling ber aniin thlak tam ber pawh a ni a,Thisen inmil a ngai kher lova,chhung hnaite atang chauha dawn leh pek tur a ni hek lovin, kum lama bithliah a awm miau loh avangin naupang leh kum upa tak mit pawh a hmanpawlh theih vek,chuvang chuan tuna nungdama la awm mek,naupang atanga tar thlengin mit tha lo te tan mit hi a pek vek theih a,“Midangte tana Malsawmna’ ni tura Bible in min zirtir anga thih hnua mamawh miah tawh loh tur,a la dam te’n an mamawh em em mit pek hian awlsam takin midangte tan malsawmna a thlen thei tih hriatreng a tul thu khuallian chuan a sawi a. Mizo mipui zawng zawngte mitdelte tana mit pe phal theuh turin a sawm nghal ani.
Dr KL Remsanga Medical Superintendent,CH (A) kaihhruai vawiin programme ah hian Pu Hmangaihkunga kumli anih atanga mit del, mit petu avanga mit lo var leh ta chuan a mit in khua a hmuh leh tak dan a sawi a. Phal taka an mit petu mualliam tawh chhungte hnenah ‘Appreciation Certificate to Eye Donor’ hlan an ni bawk a. Eye Bank leh mit chungchang hrang hrang Doctor te sawi ngaihthlak ani bawk.
Aizawl Civil Hospital ah hian kum 2008,July 31st khan Eye Bank neih a lo ni tawh in,ni 5.9.2017 thlenga thih hnua mit donate ( Mit pek tum ) in register tawh mi 4634 an awm tawh in, mit dawng tur mit thlak ngai in register tawh mi 296 awm in tun thleng hian thih hnua mit pe tawh hi mi 302 an ni. ( Cornea – 598 )
