Vawiin chawhma khan Chief Minister Pu Lal Thanhawla chuan Synod Conference Centre-ah Mizoram Secondary School Teachers' Association(MISSTA)  18th  Annual General Conference  - 2017 a hmanpui a. MISSTA conference hawnna inkhawm hi neih zawh a nih hnuah rorel inkhawm in a chhunzawm a ni.

MISSTA khawmpui chhimtu, zirtirtute hmaah thu sawiin Chief Minister Pu Lal Thanhawla chuan ram rawngbawlna hrang hrang zingah zirtirtute mawhphurhna leh pawimawhna chu a sang bik hle nia a hriat thu te; amah ngei pawhin nih a lo tum thin tawh, engemaw thil inher danglam vanga a thawh theih tak loh leh a hnathawh chak zawng tak a ni tih a sawi a. Zirtirtute File chu an zirlai te a nih avangin an inthlahdah a thian loh thu a sawi a. " Naktuk, naktip a kan tu leh fate khua leh tui tha an nih theihna tura nitina enkawl a, zirtirna pe thin tu te in ni a inpekna thuk tak nen in rawngbawlna a ngai chunga hna in thawh a ngai", a ti a. Chief Minister chuan zirlai te chu nakin lawka ramhruaitute an ni tia hrilh thin chu a dik tawk lo tih sawiin ramhruaitu, mi hlawhtling leh hotu dinhmun luah thei tur chuan zirlai naupang nih lai  atanga 'thupek tiam nei hmasaber' - " I nu leh pa chawimawi rawh" tih  zawm te, a bikin Mizo naupang tan chuan aia upa zah leh an thuawih, hawihhawm leh  Zonunmawi mil a nun te chu malsawmna hnar a nih bakah tihtur hmasa a ni a ti.

Chief Minister Pu Lal Thanhawla chuan kuttlinglo sum beiseitute vanga Mizoram  hmasawnna a hnufum chungchang te, nunna suattu ruihlo in Mizoram a run mek chungchang te, Vaihlo leh a kaihnawih thil avanga Mizo mipui te hrisellohna te, Faina leh hriselna chungchang te bakah hrisellohna leh thil mawihnai lo ah te  Mizoram  hmahruaitu a nihna chungchang te a sawi a. Zirturten an hriat ngei tul a tih thu leh he dinhmun  hmuhchianna atanga remhriatna an neih a, an enkawl zirlai ni mek,  Mizoram hmabak te chu  dinhmun him zawk a an hruai leh export quality nei tura an chher theih nan Mizoram dinhmun chiang tak an hriat a ngai a ti. Social Media, Cable TV a Mizo tawng hmandan te  leh chanchinthar puangtu te tawngkam hman danah lehzel te pawh Mizo tawng dik tawklo hman leh intihhmuh a larchho zel chu pawi a tih thu leh a vei tak meuh thu a sawi  a. Mizo tawng mawi tak leh Mizo Literature hauhsakna te humhim a nih theih nan zirtirtute an pawimawh tak zet a ni a ti.

Zirtirtute laka nu leh pate  bakah ram mipui ten an beisei sawiin Chief Minister chuan, " In File khawih hi minung, thlarau nei, kan tu leh fate an ni a. Nakin lawkah khua leh tui tha an nih theih nan tha taka min enkawl sak a ngai a. Nangmahni pawh chhunglam leh pawnlam invawng ulukin incheidanah te, manners leh etiquette chungchangah te, zuk leh hmuama fihlim kawngah te, taksa invawnfai leh hriselna kawngah te, hun vawndik leh Mizo tawng dik hman chungchangah te thlengin entawntlak leh kawhhmuhtu, 'Role Model' in nih", kan beisei a ni a ti.

MISSTA khawmpuilian hi an pawl Vice President Pu Lallawmzuala'n a kaihruai a. He hunah hian kum 2016 - 17 chhunga an member 8 thi ta te sunna hun hman a ni a; kumin chhunga pension a chhuak tur zirtirtu 37 te thlahna hun pawh hman a ni a. MISSTA aiawhin an pawl President Pu K. Zatlunga'n  Chief Minister's Relief Fund atan Rs 1,00,000/-,  Chief Minister Pu Lal Thanhawla hnenah a hlan a. Tun dinhmunah MISSTA-ah hian member 1052 an awm mek a, High School zirtirtu hnaruak hnawhkhah loh Post 267 a awm mek a ni.