Vawiin chawhnu khan Health Minsiter Pu Lal Thanzara chuan Chanmari West Health Sub Centre a hawng. 

Pu Lal Thanzara chuan mipui hriselna atan Health Department in tan a la a, programme hrang hrang a kalpui mek hlawhtlinna turin tha leh zung tam tak a seng a, mipui hriselna pawhin hma a sawn nia a hriat thu a sawi a. Duhthusam target la thleng lo mahse naupang kum khat hnuai lam leh nu nau chunga thihna Infant Mortality leh Maternal Mortality Ratio a tlahniam zel a, kuminah Aizawl Civil Hospital-ah chutiang thihna a la thleng lo chu a lawmawm takzet a ni, a ti. Health Minister chuan mihring hriselna ti chhe thei - zu leh drugs, zuk leh hmuam, kuhva te bakah mihring taksa ngeihloh chi reng reng laka insum turin Mizo mipuite a chah a. Vanduai vang ni lo, fimkhur tawk loh vanga kai theih natna lakah kan inveng thei a ni, a ti. 

Health Minister chuan Zemabawk Cancer Hospital sak that leh hmanraw leina tur sawrkar laipui atangin cheng vaibelchhe 46 hmuh a nih tawh thu leh Japan International Cooperation Agency (JICA) atangin tanpuina cheng vaibelchhe za chuang dawn beisei a nih thu a sawi a. North East hmun danga awm ve lo Digital X Ray khawl neih a nih thu te,  sawrkar hnathawkten damdawi ina inenkawlna senso an bill theih ang deuha Health Care Scheme kaltlanga BPL leh APL chhungkua ten an bill ve thei ta te chu Health lama hmasawnna tilangtu a ni, a ti. Chanmari West khawtlangin Health Sub Centre building tha tak an nei chu lawmpuiin Minister chuan mahni ta ang taka cheibawla, hmang tangkai turin duhsakna a hlan a ni.

Cheng nuai 14 senga sak Chanmari West Health Sub Centre hi July ni 18, 2016 ah sak tan niin September ni 19, 2017-ah sak zawh a ni a. Departmental work a kalpui niin a zau zawng (floor area) hi 32.5sq.m. a ni. 

Hawnna inkhawm hi Health Principal Director Dr F Lallianhlira’n a kaihruaiah hian Sr. Executive Engineer Pu Vanlalzuala Chenkual chuan building sak dan  a tarlang a, Health Services Director Dr.H.Lalchungnunga’n lawmthu sawiin hun hnung a khar a ni.