Vawiin chawhma dar 11 khan Mizoram Taxation Service Association (MITSA) General Meeting vawi 10-na leh “Workshop on Digital Signature in Modern Taxation” chu Hotel Regency, Zarkawt-ah hman a ni a. Chief Minister Pu Lal Thanhawla’n a hmanpui.

Chief Minister chuan MITSA General Meeting-a Khualliana sawm a nih avangin lawm thu a sawi a. Taxation Department chu sawrkar tan chhiah tam tak la khawmtu leh technology hman tangkai lama hma hruaitu an ni chu lawmawm a tih thu a sawi bawk. Ram than nan tax base leh resource base neih that a pawimawh a; Mizoramin resource kan ngah loh avangin chhiah (tax) tling khawma kan innghah a ngai a; chu vang chuan duh angin hmasawnna hna a thawh chak theih loh a ni, a ti. Mipui harsatna thlen si lova chhiah lakna hnar tha zawn thiam a pawimawh thu sawiin, Taxation Department officer-te pawh chuti lam hawi chuan an ngaihtuahna seng turin a chah a. Sawrkar hna thawhnaah discipline ngaih pawimawh leh zuk leh hmuama insum a tul thu a sawi.

Chhiah chawi tam apiang ram changkang an ni thin a; Mizote pawh hian chhiah chawi tam i la, sawrkarah neitu leh mawhphurtu nihna rilru kan pu thei zawka a rin thu sawiin, Chief Minister chuan sawrkara thawh neih ve aia sawrkar atanga hmuh ringawt kan tum thin chu sim a hun tawh hle a ni, a ti. Taxation Department-in duh tam tak an nei chunga a nuar zawnga sawrkar an la nawr ngai loh thu an sawi chu chhuanawm a tih thu sawiin, nawrh ching chu neitu nihna rilru pu lo an ni thin a; kan thil nawr hi mahni tan chauh nge ram leh hnam tan tih ngun taka ngaihtuah a tul a ni, a ti a. CVJAC-te nen an inkawmnaah pawh an harsatna hriat thiampuiin hma lakpui a intiam a; lifetime tax lak chungchang chu sawrkar laipui thu chhuak a nih avangin, complaint ziahsak leh instalment-a pek dan pawh ngaihtuahpui a inhuam thu a lo hrilh tih sawiin, rickshaw kawngkhar dinglam hawn theih lohva siam pawh mipui himna tura tih a ni chunga duh loh tlat chu tha a tih loh thu a sawi. An sawrkar hnuah duhsak zawng hnena taxi leh bus permit pek a awm loh thu a sawi bawk.

Taxation Department Secretary Pu Lalropara chuan Taxation officer-te chu sawrkara chhiah chhung lut turte’n an dawr ber tur an nih avangin hmel leh nungchang zahawm tak put reng a tul thu a sawi a. Commissioner of Taxes Pu K.Sanglawma chuan Department hma lakna tlangpui a tarlang.

Chawhma hun hi MITSA President Pu Kailiana Ralte-in a kaihruai a. MITSA Secretary Pu C.Vanlalchhuana’n report pein, member boral ta sunna hun hman a ni bawk. Superintendent of Taxes Pu H.Hrangthanmawia chuan Digital Signature Certificate chungchang a zirtir a. Chawhnu lamah rorel leh hruaitu thlanna hun an hmang.

Tun sawrkar kum liam taah khan Mizoramin state own tax revenue a thawh chhuah zawng zawng atanga zaa sawmsarih pakua (79%) chu Taxation Department kal tlanga thawh chhuah a ni a. Kum tin chhiah atanga an sum hmuh hi pung zelin, 2015-16 chung khan Rs vaibelchhe 249.76/- an hmu a ni.