Mamit District a mi huaisen lawmman Uttam Raksha Padak Award (URPA) leh Jeevan Raksha Padak Award (JRPA) 2015 chu vawiin khan Mamit DC Conference Hall-ah Pi Lalbiaksangi, District Bawrhsap –in a hlan.

Huaisen lawmman dawngtute hi Laldinpuia, S.Sabual (URPA), R.Rothantluanga, Lallen (JRPA), Podo Soba, Marpara North (JRPA) leh Syamol Kanty Chakma, Marpara North (JRPA) te an ni. Uttam Raksha Padak Award hian chawimawina thuziak, medal leh pawisa fai Rs.60,000/- keng telin, Jeevan Raksha Padak Award hian chawimawina thuziak, medal leh pawisa fai Rs.40,000/- a keng tel thung a ni.

Vawiin Award hlannaah hian huaisen lawmman dawngtu te atangin Pu R.Rothantluanga chiah a inlan thei a, rokhawlhna avangin midang an inlan theilo a ni. He hun hi Pu H.Lianzela, Addl.DC, Mamit-in a kaihruai a ni.

Huaisen lawmman dawngtute dawn chhan tlangpui:

1) Laldinpuia, S.Sabual- (URPA)

Laldinpuia S/o B.Lalrema, South Sabual hian an thianho a ram riahnaah savawm no hruai lai tawkin, savawm chuan an thiannu Lalhmunmawii chu seh tumin a bei a. Laldinpuia chuan chemin savawm chu a lu ah a lo sat mawlh mawlh a, savawm thinrim chuan Laldinpuia chu bei lehin 30ft. vel dawn a thui an lum dun a, savawm hi a lum thui zawk avangin a insaseng ta a ni. Vanneihthlak takin Laldinpuia hian hliam na lutuk a tuar lo hlauh a ni.

2) R.Rothantluanga, Lallen (JRPA)

Ni 25 June 2014 khan Saithah leh Phuldungsei inkar 11kv line siam tha in R.Rothantluanga leh a thianten hna an thawk a, line an shutdown tir hnuah hna thawk tannin dar 11:45a.m-ah power supply a rawn kal ta thut mai a, current kal chuan Lalpeksanga S/o Lalremmawia, Lallen electric ban lera awm lai chu a man ta a. R.Rothantluanga hian Lalpeksanga chu theihtawp chhuaha chhanchhuah a tumna lamah amah pawh electric current hian manin a hnungzang a kang chhuak deuh vek a, a mawngtam leh a malpui hmun 15 laiah electric current chhuahna pem na tak a tuar tel bawk. Vanneihthlak takin Lalpeksanga nunna hi chhanin, amah pawh nungdamin a chhuak a ni.

3) Podo Soba, Marpara North (JRPA)

Pi Podo Soba w/o Arunkanti, Marpara North hi Mar Lui kai tumin ni 8th July, 2015 khan Motor Boat-ah an midang 15 nen an chuang a, an chuanna lawng hi khaikhup thutin lawnga chuang zawng zawng hi luiah hian an tla vek a. Podo Soba hian tuihleuh thiamin Pi Lalsiamliani w/o Pu Lalsangzuala leh a fanu kum thum mi te chu a chhanchhuak a ni.

4) Syamal Kanty Chakma, Marpara North (JRPA)

Syamal Kanty Chakma Marpara North hi Mar Lui kai tumin ni 8th July, 2015 khan Motor Boat-ah midang 15 nen an chuang a, an chuanna lawng hi khaikhup thutin lawnga chuang zawng zawng hi luiah hian an tla vek a. Syamal Kanty Chakma hian tuithleuh thiamin Pu Lalsangzuala leh a fate pahnih chu a chhanchhuak a, vanduaithlak takin Pu Lalsangzuala hi lawng a an dah hnuah lawng a tanga tla lehin a nunna a chan ta a ni.