Mizo Feature siam inelna hmasa ber, 1st Mizo Feature Film Making Competition 2015, I&PR leh Mizo Film Development Society (MFDS) tangkawp buatsaiha lawmman dawngtute hnena lawmman semna vawiina I&PR Auditorium a neihah, Chief Minister Pu Lal Thanhawla chuan film tha bik thlan chhuah pathum siamtute hnenah lawmman a hlan.

Chief Minister chuan Mizo ten film siamna kawngah a zirna kan neih loh avangin kan la sanglo hle a ni a ti a. Heti chunga film inelna endiktuten a tehfung an hmante chu a thain a changkang hle a, hmasawn zel turin kawl a eng hle a ni a ti a.Heng an tehfung anga dik taka film te siam anih chuan kan thleng sang thei hle dawn a ni a ti a. I&PR department leh MFDS te hmalaknaah lawmthu sawiin, Music and Fine Arts ah leh Visual Art abikin Painting lam tihchangkan kawngah sorkar angin theihtawp chhuah thin anih thu a sawi a. Painting ah phei chuan Mizo thalaite kan duailo hle a, hnamdangte en theihin Delhi ah te pawh a pholanna buatsaih tawh thin a ni a ti. Hnam hrang hrangte inhriattawn theihna kawng pakhat chu cultural exchange buatsaih te a ni tiin, Pu Hawla chuan hemi atan hian film hi a pawimawh thei hle a ni a ti a. Mi te ngaihsan tlak ni turin theihtawpa hma lak tlan a tul a ni a ti.Chief Minister chuan thalaite hian tuina bik nei vek an ni tiin, khawvel thang chho zel mila ke pen ve a that rualin, mahni duhdan leh tui dan anga kal hi a tha ber ang em tihte chu ngaihtuahnaah a awm mek bawk a ni a ti.

Chief Minister chuan sorkar-in alo tum tawh angin thalaite tan kawng hrang hrangah sum harsa chungin khawvel thar a siam chho mek zel a ni a ti a. 14th Finance Commission atanga sum hmuh kan in beisei chu beisei tur a awm lova, special category state kan nihna te pawh nuaibo an tum a, project hrang hrang kan neihte pawh 90:10 a kalpui thin chu 75:25 te 50:50 te ni turin rawtna te an siam a. Hmarchhak state 8 ten Prime Minister hnenah Joint Memorandum te pawh kan thehlut a ni a ti. Hei vang hian sum lamah harsatna lian tak kan tawk mek a ni a ti a. Chuvangin kan thlen chin atang zel hian hmasawn kan tum tur a ni a ti.

I&PR Secretary Pi Rosangpuii chuan film siamna kawngah kailawn sang kan la kailo a ni a ti a. Film siam tih hmasawn na kum 2012 atang khan hmalak tan anih thu sawiin, nodal department ah I&PR chu ruat a ni a ti a. Mahni puala Mizo ten film siam kawngah hma a la thei hi a lawmawm hle a ni a ti.

Pu Lalsawmliana Pachuau, Sr. Adviser, MFDS chuan film lama tuimi te tana sorkar-in khaw eng a rawn siam hi a lawmawm tak meuh a ni a ti a.Hmasawn zelna tura film siam inelna buatsaih a ni chu a lawmawm hle a ni tiin, kan rohlu ala ni thei dawn a ni a ti. MFDS in hnam ro tling film pahnih tal siam tum anih thu a sawi bawkin, commercial anga kal chhoh tum anih thu a sawilang bawk.

Mizo Feature Film siam inelna hi minute 80 - 90 chhung awh tur tih a ni a, a film siamtute hi thla hnih chhunga siamhman tura tih an ni. Inelnaah hian film 8 a lut a, a endikna tehfung chi hrang hrang hman a ni. Film tha ber pakhatna chu C. Hmingthangvunga siam ‘Tluangtei’ thlan a ni a, certificate leh Rs.1,50,000/- a dawng a, pahnihna chu Lalawmpuia Khiangte siam ‘Beiseina In’ dawngin, certificate leh Rs.1,00,000/- hlan a ni a, pathumna chu KC Zoherliana siam ‘Inhlanna’ in a dawng a, certificate leh Rs. 75,000/- a dawng a ni. Best Director etc. lawmman hi Pi Lal Riliani, President, IST&H, Mizoram Chapter in hlanin, Best Director chu Lalawmpuia Khiangte a ni a, Best Script Award chu C. Lalmalsawmi’n a dawng a, Best Actor chu George KC Zoremsiama a ni a, Best Actress chu Lalhlunchhungi a ni. Hengte bakah hian film siamtu mi panga (5) te hnenah Participation Prize, certificate leh Rs.10,000/- theuh Pi Rosangpuii’n a hlan bawk a ni.

Lawmman semna inkhawm hi Pu Jim K Chozah, Director, I&PR department in a kaihruai a ni.