Mizo hmeichhia International Boxer, tun thla July a Serbia rama India aiawha Gold leh Bronze Medal la te chawimawina inkhawm, Mizoram Boxing Association (MIZBA) in vawiin tlaia I&PR Auditoriuma buatsaihah Chief Minister Pu Lal Thanhawla chuan chawimawina parthi a awrh tir.

Chief Minister chuan Mizo thalaite zingah chawimawi tlak an awm hi a ropui hle a ni a ti a. Thalaite tana sorkarin khawvel thar a siamna kawngah hma ala chho mek reng a ni a ti a.Infiamna kawng hrang hrangah sports association te leh sports administrators te tan lak tlanna avanga hmasawnna hmuh theiha a awm hi a lawmawm hle a ni a ti a. Kan thenawm state Manipur mite hi tluk lo kan inti mai thei a ni tiin, Pu Hawla chuan an ram hi a rem a, a tha bawk a, chubakah National Games thleng tawh te an nih avangin infiamna ruhrel tha tak tak nei tawh an ni a ti a. Heti chung hian keini Mizote hi kan hnufual teh chiam bik lo a ni a ti.Tun Olympics khelh meka ram aiawh an tir thei hi keini tan chonaah kan lak a tha hle ang a ti a ni.

Kan thalai nfiammi chhuanawm tak takte hmalam kawl a en zelna turin keini sports administrators te hian mawhphurhna thui tak kan nei a ni tiin, Chief Minister chuan nasa lehzuala kan tan tlan a ngai a ni a ti a. India ram hi infiamnaah inthliarna leh induhsakna a nasat avangin, kan thalaite thiamna piah lamah sports administrator ten inzumzuk miah lova nasa taka kan beih chhoh a, tan kan lak tlan a ngai hle a ni a ti.

Vawiina Boxer chawimawi te hi kumin 2012 July ni 5 - 9 chhunga Golden Glove of Vojvodina International Sub Junior Women Boxing Tournament, Novi Sad, Serbia neih a hnehna changtute hi, Lalenkawli, Lawngtlai, 48 Kg a Gold Medal leh Lalruatfeli, Edenthar,Aizawl, 57 Kg a Bronze Medal la te an ni a. Anni chawimawi rual hian Vanlalduati, Ramhlun, Aizawl, 51Kg a 4th Inter Zonal Women National Boxing Championship, 12 - 15 July 2012, Vishakapatnam a neiha Gold Medalist & Best Boxer ni bawk chu chawimawi a ni bawk a ni.

Chief Minister Pu Lal Thanhawla hian Mizoram State Olympic Association bultuma infiamna a ram pela chhuakte hnena pocket money Rs.20,000/- theuh a pek thin chu chawimawina dawngtu te hnenah hian a hlan bawk a ni.

Chawimawina inkhawm hi MIZBA President Pu Thangkhuma’n a kaihruai a ni.