Lehkhabu Volume hniha buatsaih, ‘Mizo kan ni’ tih H. Thangluaia ziak chu vawiin khan I & PR Auditorium-ah Chief Minister Pu Lal Thanhawla’n a tlangzarh.

Lehkhabu tlangzarh inkhawmah Chief Minister chuan he lehkhabu hi lehkhabu tha tak, Mizote min insuihkhawma, hnam ropuia kan din theih nana hmanraw tha tak anih ngei a beisei thu a sawi a. Tunlai Mizoram boruak leh Zohnahthlak tan a pawimawh tih hriain, tlangzarh tura sawm a ni chu, a lawmawm hle a ni a ti a. Hmarpa ngeiin ‘Mizo kan ni’ a ti hi a lawmawm tak meuh a ni a ti. Mizote hi British khan hmun hrang hrangah min dah mahse insuihkhawm duhna hi a nung vek a ni a ti a. Mizo tawngah hian tawng tam tak a awm a ni tih kan hriat a tul a, kan awmna a zir zelin kan lam dan a dang thei mai a ni a ti. Duhlian tawng hmang pai deuhte Mizo ta lo viaua kan hriatna te hi kan inenfiah angai a, chuvangin Zoram chhunga awmte hian kan fimkhur angai bik a ni a ti.

Chief Minister chuan hnam ropui nih tuma mahni Mizo tobul inhriat si loh hi a pawi thei hle a ni tiin, kan tobul hi chik tak leh tha taka kan hriat hi a pawimawh a ni a ti a. Manipur-ah zohnahthlak ten Mizo ah an indah duh loh avangin Mizo group a an awm ve loh thu sawiin, Pu Hawla chuan zohnahthlak ni ngeia kan hriat thenkhatte chuan Naga hnamah inchhalin Naga groupah an awm tawh a ni a ti. Mizoram chu Mizote inpui, Mizote ‘Jerusalem’ kan ti a, Manipura Kuki leh Paite te inkara buaina achhuah khan ‘inpui’ ah an rawn raltlan a ni a ti a. Mizo nih hreh leh Mizo nih inhai thinna hian keimahni zingah harsatna a thlen thin a, mangan tawpah Mizo nihna kan pawm theih chauhte hi, kha buaina khan zir tur tha tak min siam sak a ni a ti. Mizo kan nih angin, harsatna kan neihte chu tharum hmang lova, dawhkan kila sawi fel theih vek a ni a ti.

Mizo tawng 8th schedule a dah chungchang a sawiah, Chief Minister chuan ‘8th Schedule a Mizo tawng dah hi ka thlawp a, amaherawhchu, mi tam tak ka’n be tawh chungin rin aiin a harsa a ni’ a ti.

Lehkhabu tlangzarh inkhawm kaihruaitu Pu Van Hela Pachuau, Chief Secretary chuan Zoram chhunga cheng, Mizote hian unau zinga upa ber nih kan thiam tawklo a ni a ti.

Lehkhabu tlangzarh inkhawmah hian Auditoriuma lenglo khawpa tam lehkhabu hlutsaktu an kal a. Pu L.P. Pudaite, Pu Lalthangfala Sailo, President, MAL, Pu C. Lalrambuatsaiha, President, MJA, Pu J.Malsawma, Adviser, MAL, Pu P.L.Thanga IAS(Rtd), Member & Secretary, State Planning Board, leh Pu C. Chawngkunga ten thusawina hun an hmang bawk a ni.