456/2026-2027

Dated Aizawl, the 11th May, 2026: Vawiin khan Chief Minister Pu Lalduhoma chuan Assembly Annexe Building Conference Hall-ah 166 Infantry Battalion Territorial Army (Home & Hearth) a thawk tur, Mizo thalai thlan chhuah hmasa ber mi 144, mipa 135 leh hmeichhia 9-te chu a vailiam a. Tun thla ni 15 khian training turin Shillong an pan ang.

He hunah hian Home Minister Pu K. Sapdanga; Champhai South MLA leh Territorial Army (TA) Establishment & Coordination Committee Chairman ni bawk Lt. Col. (Retd) Clement Lalhmingthanga; Home Secretary Pu Vanlalmawia; TA Group Eastern Command Commander- Shaurya Chakra, Brig.Manoj Kumar Patel te bakah Armed Forces leh Assam Rifles officer dangte leh state official pawimawh dangte an tel a ni.

Thusawiin Chief Minister chuan, vawiin hi Mizoram tana ni lawmawm leh chhinchhiahtlak a ni. Territorial Army hi a awm tih pawh tunhmain ka lo la hre ngai lo va, kan hriat rualin central sorkar thuneitute hnenah Mizo Battalion min pe ve turin ka dil nghal a. A tirah mi 70 lak min phalsak a, a taka kan lak hmain kan dil belh leh a, mi 144 lak min phalsak ta a. Prime Minister Pu Narendra Modi, Union Home Minister Pu Amit Shah, Defence Minister Pu Rajnath Singh leh Chief of Army Staff General Upendra Dwivedi te chungah kan lawm hle.

A dang lak belhna tur hmalakna kan buaipui leh mek bawk a. Mizo thalai, a tam thei ang ber hi lut se, eizawnna a nih piah lamah ram venhimna hna a ni a, a zahawm a, nunkawng kaihruaitu tha a ni bawk si a. Thahnem kan ngai hle a ni.

Vawiina training tura kan vailiam tak kan thalai mi 144 te hi hmahruaitu, Mizo thalaite hmelhmang tilangtu tur in nih avangin theihtawp chhuah turin kan beisei che u a. In kalna apiangah zo nun ze mawi tak takte lantir zelin, kan ram leh hnam timawitu nih in tum tlat dawn nia, tiin a chah.

Home Minister Pu K. Sapdanga pawhin thu sawiin, Territorial Army hian thiamna (Civilian Excellence) leh sipai discipline (Military discipline) tha a keng dun a, zahawmna leh hmingthanna a thlen theih bakah nungchang siamthatnate a keng a. A tha em em a ni, a ti a. He hnaa tling tharte lawmpuiin theihtawp chhuah zui tur leh an mawhphurhnate hlen ngei turin a chah a. Training laia an lo hnual deuh a nih pawhin, 'Kawng bumboh leh harsa hian hmun mawi takah min hruai thin a ni,' tih hre reng turin a chah a ni.

Lt. Col. Clement Lalhmingthanga, pawhin thusawiin Mizo Territorial Army chu Chief Minister Pu Lalduhoma hmalakna vanga lo awm a nih thu a sawi a. Mizoram tana hriatreng tawh tur hmasawnna chhinchhiahtlak a ni, a ti a. Lak belh kan dil leh mek a, kumin September thlaa Advertisement tihchhuah hman kan beisei dawn a ni, a ti.

Brig. Manoj Kumar Patel pawhin thusawiin Mizo Territorial Army hi Chief Minister Pu Lalduhoma hmalakna leh a thawhrimna zara lo awm a ni a, a chungah kan lawm a ni, a ti a. Territorial Army post ruak a la tam thu sawiin, a theih chuan hnawhkhat zel kan duh a ni, a ti.

Thla thar atang khian MTA-te chuan training an nei tan dawn a. Chu mi hmaa tihfel ngaite tifel turin tun thla laihawl hian Shillong an pan phawt ang a. Mipa 135 te hian Shillong-ah Training an nei zui ang a, hmeichhia 9 te hian Bangalore-ah training an kal thung ang.