455/2026-2027

Lunglei, 2026 Ṭomir thla ni 11: Tukin zingkar khan Health & Family Welfare Minister Pi Lalrinpuii (Lunglei East bialtu MLA ni bawk) chuan a bial chhung, Lunglei Electric Venga awm, Animal Husbandry & Veterinary Department hnuaia Slaughter House (Sa Talhna In) chu a hmunah tlawhin, ṭangkai taka hman theih dan tur a enfiah.

Minister hi Lunglei Municipal Council (LMC) Chairman Pu Lalzuithanga, Vice Chairman Pu K. Lalrinawma, Ward VI Councillor Pu R. Lalremsiama, khawtlang hruaitute leh sa talhtu pawl ai awhte'n ṭawiawmin, AH & Vety Department Joint Director Dr Ngurzidingi Sailo, District AH & Vety Officer Dr Lalengzami Hrahsel, Integrated AH & Vety Training Institute Principal Dr Lalmuanpuia Samte leh thawktu dangte'n a hmunah an lo dawngsawng a. Slaughter House hmunhma fang hovin, a dinhmun an en ho bakah, ṭangkai taka hman zui a nih theih dan tur ruahmanna hrang hrang an sawi ho.

Slaughter House hi kum 2013 khan AH & Vety Department-in a sak bul ṭanin, kum 2015-ah hman theiha sak zawh fel a ni a. Chhan hrang hrang avangin hman ṭangkai lohvin a awm zui a. Bialtu MLA & Minister Pi Lalrinpuii chuan hei hi ngai pawimawhin, a vei hle a, a hmunah tlawhin ṭangkai taka hman a nih theih nana hma la turin LMC hotute, AH & Vety Department leh sa talhtute chu khunkhan takin a sawipui a ni.

Minister Pi Lalrinpuii chuan ran talh avangin natna hrik inkai theih tam tak a awm a, khaw chhunga sa talh mai mai chu a him lovin, a hrisel lo tih sawiin, Lunglei khawpuia mihring pung chho zel avang leh LMC a lo din tak avangin inkaihhruaina fel tak nen sa talhna in chu hman ṭangkai dan ngaihtuah a ṭul tih a sawi a. Sa talhna in chu Lunglei mipuite'n sa thianghlim leh hrisel an ei theihna atana ṭangkai tak tur a nih thu sawiin, sawrkar thuneitute leh department lam nen ṭang hovin a hma thei ang bera hman theih turin hma lak an tum thu a sawi.

Minister hma lakna avang hian Power & Electricity Department lam pawhin Slaughter House bulah hian transformer thar bun turin hma an lak nghal tur thu an sawi bawk.