795/2023-2024

Aizawl, June ni 14, 2023: Mizoram State Cooperative Marketing & Consumers' Federation Ltd. (MIZOFED) chuan vawiin khan Synod Conference Centre, Sikulpuikawn Aizawlah Annual General Assembly vawi 25-na an hmang a; Chief Minister Pu Zoramthanga chuan khuallian niin he hun hi a hmanpui.

Chief Minister Pu Zoramthanga chuan MIZOFED din a nih chhoh dan sawiin, hmasawnna atana cooperative society din pawimawhna leh tulna hmathlir nei chungin a remchan dan ang anga bultan a nih thu te a sawi a. Tun hnu ah pawl chungtlung zawkah insiamin kalphung felfai zawk neia, hlawkna tam zawkte tel theia an awm chho ta zel chu lawmawm a tih thu a sawi. Chief Minister chuan cooperative movement hi ramin chak zawka hma a sawn theih nan a pawimawh thu sawiin, hmasawnna hna sawrkarin a ruahman leh a duan te chu a theihna chen chenah privatize zel tha a tih thu a sawi a ni. Chief Minister chuan Mizoram hmasawnna leh siamthat hna chu a ram neitu, a chhunga chengte kutah a innghah thu sawi bawkin, hripui leng leh thildang dang avangin harsatna ramin tawk mah ila, kan tawn aia chhiatna nasa zawk lo tawng tawh ram ropui taka insiam a intungding leh ta te hre rengin, hmasawna nasa zawk kan thlen thei a ni tih hria a, mahni zawn theuhah thahnemngai taka ram tan thawk ang u tiin kalkhawmte a sawm a ni.

Cooperative Societies Registrar Pu Amol Srivastava chuan he hunah hian thu a sawi bawk a. Cooperative movement chu democracy leh sumdawnna kalphung rinawm leh innghahna tlak kalkawp a nih thu sawiin, MIZOFED kalphung chuan chu chu a phawkchhuak hle nia a hriat thu a sawi a. COVID-19 hripui len laia khawtlang mipui chhawmdawl kawnga sawrkar hmalakna an tawiawm that danah te lawmthu sawi bawkin, state chhung cooperative society lian ber an nih angin entawntlak taka kal zel turin leh hlawk zawk leh hmasawnna nasa zawk an laka a hmuh zel a beisei thu a sawi a ni.

Vawiin hian Branch tithate hnena lawmman semna neih a ni bawk a. Khuallian chuan lawmman hlan in, Mizofed hnuaia division pathum a branch hrang hrang tithate chu hengte hi an ni :

(a) POL division: Lawngtlai Branch

(b) LPG division: Aizawl Branch

(c) E&C division: MIZOFED Store, Lunglei

Lawmman hian certificate leh cheng 8000 theuh a keng tel a ni.

Vawiin MIZOFED General Conference ah hian MLA Pu K. Laldawngliana, Commerce & Industrial Development Board Vice Chairman pawh a tel a ni. Conference hi hun thumah thenin, hun hmasa Chief Minister hova hman hi an Chairman Pu K. Rothangpuia chuan a kaihruai a. Managing Director Pu Rinzuala hnen atangin annual report ngaihthlak niin Vice-Chairman Pu Laldingliana Ralte chuan lawmthu sawiin hun a khar a. Hun hnihna chu rorel a hman niin, hun thumnaah kum 2023 atanga 2028 chhunga Board of Directors a tel tur thlanna neih a ni a. Indian Constitution 97th Amendment angin, Mizoram registered Cooperative Societies zawng zawng te Board leh Managing Committee term kum 5 chu kum 2013 atang khan hman tan a ni.

Report:

Kum 2022-2023 chhung in Board of Directors Meeting vawi -7 neih a ni a, Executive Committee vawi-4 leh Selection Committee vawi-4 neih a ni bawk. MIZOFED hi Cooperative Marketing leh Consumer Federation a nih angin sumdawnna hlawm thum lian deuh deuh a kalpui a, chung te chu:-

1) Petrol Oil Lubricants (POL)

2) Liquified Petroleum Gas (LPG)

3) Essential and Consumer (E&C)

I. POL - SUMDAWNNA: POL ti a sawi thin Petrol, Diesel leh Kerosene Oil te huam telin MIZOFED hian Mizoram hmun hrang hrang pakuaah Petrol Pump a nei a. Chung te chu:

1) Aizawl

2) Lunglei

3) Lawngtlai

4) Vairengte

5) Kolasib

6) New Capital

7) Champhai

8) Hnahthial

9) Thenzawl

MIZOFED hian Assets a siam belh nasa in, Petrol Pump thar tur hi Kawnpui, Hrangchalkawn, Champhai leh Phunchawng ah te buatsaih mek a ni a, heng atan te hian NCDC-ah Financial Assistance Rs. 210 lakhs dil niin anni pawhin an rawn sanction tawh a ni.

II. LPG-A SUMDAWNNA: LPG, ei rawngbawlnag gas sumdawn hian MIZOFED hian hma zau takin a la a, Dealership hi District paruk naah pawh ah neih mek ani. Chung te chu:

1) Aizawl

2) Champhai

3) Kolasib

4) Serchhip

5) Mamit

6) Siaha

III) ESSENTIAL & CONSUMER GOODS A SUMDAWNNA: MIZOFED hian Essential Commodities leh Consumer items chi hrang hrang ah Dealership a nei a. Chungte chu - Mahakosh Edible oil (Tel), Amul Products leh Hawkins Pressure Cookers a ni. Heng bakah hian item dang mipui mamawh chi hrang hrang rate tlawm ther ang ber a zawrh turin a kawl tel bawk.

Mizoram khawpui hrang hrang ah sumdawnna a kalpui mek a. Aizawl-ah hmun panga heng- Zuangtui (Main Hub), Bawngkawn, New Market, Ramhlun North leh New Capital Complex a te dawr a nei a ni. Heng bak ah hian Serchhip leh Champhai ah Amul Products leh items dang te, nitina chhungkaw mamawh chi hrang hrang te zawrh na dawr hawn a ni bawk. Lunglei-ah Essentials leh Consumer dawr hawn a ni a, April, 2023 atangin Wholesale business kalpui a ni bawk. Heng Consumer Stores atang pawh hian MIZOFED a Share holder Cooperative Societies te chu agreement fel taka siamin sumdawnna nghet nei thei tura hmalak a ni bawk.

IV. INRELBAWLNA LEH STAFF DINHMUN:

1) Regular Staff - 64 nos

2) Contract - 70 nos

3) Skilled II MR - 8nos

4) Unskilled MR - 27 nos

Total: 169 nos

Kum 2021-2022 chhunga MIZOFED net profit chu Rs. 1,77,24,44.15 a ni.