794/2023-2024

Khawzawl the 14th June, 2023: Deputy Chief Minister Pu Tawnluia chuan vawiin chawhma dar 10 khan khual khua atanga damlo leh a awmpuitu a duh apiang tana thlenna tur Khualbuk, Patient Attendants' Shelter (PAS), Khawzawl Dinthar Veng-ah a hawng.

Khuallian Deputy Chief Minister Pu Tawnluia chuan damlo leh anmahni awmpuitu harsatna tawkte thlenna tur hmun tha tak Khawzawla hlawhtling taka buatsaih a ni leh hman theih tura hawn fel a ni ta chu lawmawm a tih thu a sawi a. A sakna tur ram petu Sub-Hqrs. MHIP Khawzawl chungah lawmthu a sawi a. District thar nih hnua Khawzawl District-in hmasawnna hmel thar a hmu thin chu lawmawm a tih thu sawiin, hengte hi District-in a ken zel a ni a, District naupangte ni mah ila hma kan sawn chho zel hi a lawmawm hle a ni, a ti bawk.

Pu Tawnluia chuan mipuiin kan inhman tawm vantlang building leh bungruate a chhe duh deuh bik nia a hriat thu sawiin, mipuite chu vangtlang thilte neitu thinlung pu chunga enkawl tur leh dim thiam turin a chah a. Khawpui tihthianghlim leh vawnfai kawnga Khawzawl MHIP in tha nasa taka an thawh thin chu fakawm a tih thu sawiin, MHIP hruaitute chu khawfai leh khaw thianghlim ni zel thei tura faina kawnga hma la chhunzawm zel tur leh hmahruaitu ni chhunzawm zel turin a sawm a. Patient Attendants' Shelter chu Khawzawl District mipui leh a mamawhtu apiangte'n tangkai taka an hman theih nana duhsakna hlanin a hawng a ni.

Patient Attendant's Shelter, Khawzawl hi UD&PA hnuaia Deendayal Antyodaya Yojana-National Urban Livelihoods Mission (DAY-NULM) fund Rs 53,35,090/- senga sak niin, September ni 13, 2021 khan bultan a ni a. Sub-Hqrs. MHIP Khawzawlin a hmun tur ram an pek bakah building sak hna hi an thawk a, inremna siam angin a enkawl chhunzawm zel hna pawh hi an thawk dawn a ni. He building hi Mizo pa chhiara chhawng thum niin chhawng khat zau zawng hi square feet 1,250 a ni a, reception counter, councelling room, kitchen, lounge, recreation room, caretaker room, dormitory mi 10 riah theihna khum 10 awmin room tinah hian toilet dah vek a ni a. Mutbu leh eirawngbawlna hmanruate thlenga dah a nih bakah solar heating system, solar inverter leh thil pawimawh dangte he building-ah hian a awm bawk a ni. Shelter for Urban Homeless (SUH) inkaihhruaina dan dinglai angin a enkawl zui zel nan kum 5 chhung operation and maintenace fund (O&M fund) khum khatah kum khat atan Rs 12,000/- zel pek thin a ni ang.

Thusawitu dang Sub-Hqrs. MHIP Khawzawl President Pi Lalrinthangi chuan Khualbuk tha tak Patient Attendants' Shelter Khawzawl tih puitlin a ni ta hi lawmawm a tih thu a sawi a. A puitlin theih nana bialtu MLA Pu Tawnluia, Deputy CM, UD&PA Department Director Pu H.Lianzela leh tha thawhtu zawng zawngte chungah lawmthu a sawi a ni.

Patient Attendants' Shelter hawnna inkhawm hi Pu Malsawmzuala, Jt. Director(A), UD&PA & Project Director, DAY-NULM chuan kaihruaiin Captain John Zonunmawia, CO Khawzawl Bial-in Building Pathian hnena hlanna hun a hmang a. Pu J.Laldingliana, Asst. Engineer, UD&PA Department-in technical report a pe a. Khawzawl Joint VC Chairman Pu K.Vanlalsiama'n thu a sawi bawk a. Pu Lalthakima Chhangte, DUDO Khawzawlin lawmthu sawiin hun hman a khar a ni.

Deputy Chief Minister hi Khawzawl DC Pu K.Lalrohlua, Khawzawl SP Pu Lalchhuanthanga leh Official dangte'n an tawiawm a ni.