4812/2024-2025

Aizawl, the 25th March 2025: Vawiin khan Chief Minister Pu Lalduhoma chuan Zuangtuia Mizoram Badminton Centre sak thar chu a hawng.

Thu a sawinaah Chief Minister chuan, Badminton hi Mizoten theihna kan neihna huang a ni a. Khawvel huapa Badminton player ropui ber ber te hi kan Asian puite an ni. Tin, India ram hi Badminton khel thiam ram kan ni a, India level-ah Mizo thalaite hi a chungnung ber ber an nih theih chuan khawvel level an thleng nghal tihna a ni. He infiamna huangah hian theihna kan nei tih lantirtu langsar tak chu tun hnaia national age level-a Mizo naupangte hmasawn nasat dan hian a tilang fiah a ni. Kan naupangten training tha zawk an neih theih nan vawiinah Badminton Centre kan hawng thei ta hi a lawmawm a. A bul lo tantu sawrkar hmasaa kan Chief Minister Pu Zoramthanga leh Dy. CM, UD&PA Minister ni bawk Pu Tawnluia te chungah lawmthu ka sawi a ni.

India ram hian Olympic 2036 thlen tumin hma a la mek a, chu mi hre ran chuan Mizoram sawrkar pawhin Vision 2036 kan lo kalpui ve nghal a ni. Vision 2036 in a tum ber chu Olympic 2036 a India ram aiawh thei khawpa tha Mizo thalai lo chherchhuah a ni. A bul tan nan Empowering Mizoram Sports (EMS) kan kalpui mek a, naupang talent nei te zawn chhuahna a ni. Mizoten theihna kan neihna huangah kan insawrbing ang a, naupang talent nei kan thlante chu uluk takin training kan pe dawn a ni.

Sports infrastructure tha neih tumin hma kan la chho mek zel a. Kan Sports Minister Pu Lalnghinglova Hmar kaihhruaina hnuaiah a bik takin Olympic sports disciplines, Mizoten talent kan neihna, infrastructure tha kan la neih si loh te lamah awmze nei taka hmalak kan tum.

He Centre hi tangkai taka hman kan tum ang a, khawvel huapa lang tham player chher chhuahna hmunah chantir kan tum dawn nia, tiin kal khawmte a sawm a ni.

Pu K. Sapdanga, UD & PA Minister pawhin thusawiin, Centre bul tantu sawrkar hmasa chungah leh a puitlin theih nana theihtawp chhuahpuitu Mizoram Badminton Association chungah lawmthu a sawi a. He ti hian Infrastructure tha tak kan han chhawp ta a,  sawrkain sum tam tak a seng a, insen thlawnna hmunah a chan kan phal lo va, kan ram leh hnam tihmingthatute chher chhuahna hmuna chantir ngei kan duh, a ti a. A awmna veng neitu Zuangtui khawtlang chungah lawmthu a sawi bawk.

Pu Lalnghinglova Hmar, Minister, Sports & Youth Services, chuan, Hyderabad-ah Gopichand Academy ka zu tlawh a, Pu Gopichand nen pawh kan inkawm a. "He sports ah hian Mizoten theihna in nei a, Centre tha tak in neih hunah phei chuan hma in sawn ngei ngei ang", tiin min lo hrilh. He hmun hmang tangkaitu tur chu MBA te in ni a, a hmelmawi leh a tangkai thuah a mawhphurtute in ni. Vision 2036 hre ranin kan kal ang a, he hmun atang hian Olympian chher chhuah kan tum ngei tur a ni, a ti ve bawk.

A hawnna inkhawm hi Pu Lalmalsawma Pachuau, Secretary, UD & PA in a kaihruai a. Rev R. Lalhmangaiha'n hunserh hmangin, Technical Report hi Pu CC Lalchhuangkima, CEO, ASCL chuan a pe.

He Centre hi Aizawl Smart City Limited kaltlanga sak a ni a. Project Cost hi Rs. 18.21 crore niin, Contractor hi Pu F. Lalliansanga a ni. Hna hi June, 2022 ah an tan a, kumin March thla hian thawh zawh a ni.

Ground Floor ah hian car 40, two wheeler 70 dah theihna hmun, reception counter, reception office, Manager quarters, Janitor rooms, store room leh a dangte a awm a. A chhawng khatna, Court awmna floor-ah hian Standard Size Badminton Court paruk awmin a sirah mipui thutna Gallery zau tak a awm. Chu mi bakah chuan Gymnasium, Instructor room, Dormitory (female & male), Match official area, Players changing & locker room, Toilet Blocks, Medical Room, Coach Room leh VIP Room a awm. Centre hian Tui dahkhawlna litre 2 lakh leng a nei bawk. 

He building hi Pile foundation nei niin a ban 120 te hi feet 30 chuanga thukah zuk phun a ni a. A him tha tawk tura ngaih a ni.

Inkhawmah hian Dr. Lallianzuala, President, Mizoram Badminton Association pawhin thu tawi a sawi a. Hma an sawn dan leh hmachhawp an neih mek te a tarlang bawk.

Centre hi Smart City Limited chuan an enkawl chhunzawm dawn a, a enkawl dan tur hi https://dipr.mizoram.gov.in/post/aizawl-smart-city-ltd-ascl-hnuaia-sak-mizoram-badminton-centre-mbc-zuangtui-enkawl-chhunzawm-dan-tur ah hian dah a ni.