3558/2023-2024

Dated Aizawl, the 30th January, 2024: Vawiin khan Chief Minister Pu Lalduhoma chuan a office-ah Mizoram Bamboo Industries Association hruaitute a kawm a. An hmalak dan te, harsatna an tawh mek leh hmalak dan tha zawk nia an hriatte a sawipui.

Chief Minister hian, an thil sawi zawng zawng te chu mimal tak pawhin a tuipui em em vek tih a hrilh a. Sawrkarin theihtawp chhuahin a ngaihtuah chho zel dawn tih sawiin, pawl anga an harsatna te, Industry malin harsatna an tawh te pawh fel taka ziaka a hnena thlen turin a chah a ni. Entreprenuer te lo tanpui che u hi sawrkarin kan duh ber a ni a, sawrkar tel lo pawhin thui takin in kal thei a, sawrkar nena thui zawka in kal theih nan in mamawh belh te lo ngaihtuahsak (facilitate) che u hi kan tum dawn a ni, a ti.

Mizoram Bamboo Industries Association te hian lawmpuina hlanin, Mizoram mau a hauva hralh chhuah tawh rih loh tha an tih thu an thlen a. Kan hma lawkah Rawthing a rawn tam leh tawh dawn a, harsatna kan tawh phah loh nan a chin pun leh thuaina tur ngaihtuah tul an tih thute, Mau Policy thar siam an duh thu leh thil dangte an thlen a ni.