No.3394/2021-2022
Aizawl the 14th December, 2021: Chief Minister Pu Zoramthanga chuan vawiin khan Mizoram College Teachers' Association (MCTA) in Annual General Conference 42-na, Taxation Department Auditorium, MINECO-a buatsaih chu khuallian niin a hmanpui.

Chief Minister chuan ram economy hmasawnna leh zirna chu kalkawp tlat a nih thu a sawi a. Hmasawnna ngelnghet nei a, sum thawhchhuah tam zawk awm thei tur chuan mihring thiamna sang zawk, mi hmantlak leh chhawrnahawm tam tak an awm a pawimawh thu a sawi a. Chung atan chuan thangtharte kaihruaitu college zirtirtute chu an pawimawh a ni, a ti. Hmasawn tur chuan hmathlir tha tak neih pawimawh a tih thu Chief Minister chuan sawiin, a tlachawp a kal ringawt chuan hlawhtling taka mi kaihhruai a theihloh thu a sawi a. Chung bakah chuan mihring hriselna a pawimawh avangin hriselna kawnga hma sawn tlan theih nan zirna inah pawh a remchan dan ang zela inhrilhriatna pek thin ni se, a ti bawk.

Sawrkarin zirna tihhmasawn a ngaihpawimawh thu leh, College hrang hranga zirna tihchangtlun a nih theih nan theihtawp chhuah ho a tul thu Chief Minister hian a sawi a. College zirtirtute chu mamawh an neihte chu sawrkarah a thlen a, a remchan ang zela hma a lakpui tur thu a sawi bawk.

Vawiin MCTA conference hawnna inkhawm hi Pu CVL Tlanhlua, Vice President, MCTA chuan kaihruaiin, Pu Lalbiakzuala, President chuan kalkhawmte lawmna thu a sawi a. Pu Samuel J. Laltlanzaua, General Secretary hnen atangin Secretary’s Report ngaihthlak niin, kum 2019 - 2021 chhunga an member nunna chan ta mi 10 te sunna hun hman a ni bawk a. Pi Lalrinsangi Nghinglova, Finance Secretary chuan lawmthu sawiin hun a khar a ni.

Conference hawnna inkhawm hi rorel leh kum 2021-2023 chhunga pawl hruaitu tur thlanna neih a ni a. Heng mite hi thlan tlin an ni:

1. President - Pu Lalbiakzuala, Govt. Aizawl College
2. Vice President - Dr. Samuel J. Laltlanzaua, Govt. Johnson College
3. General Secy - Pu CVL Tlanhlua, Govt. T. Romana College
4. Treasurer - Dr. Samuel Vanlalthlanga, Govt. Aizawl West College

MCTA hi kum 1979 a din a ni a, tun ah hian MCTA hnuai ah hian College 24 an awm mek a ni. General Secretary report-a a landan in MCTA hnuai a college 24 awm ah hian zirtirtu a nghet a thawk mi 589 an awm mek a, chutih laiin zirtirtu post ruak hnawhkhah loh hi 215 a awm mek bawk a ni.