No.3395/2021-2022

Aizawl, the 14th December, 2021: Govt. G.M Higher Secondary School, Champhaiin kum 25 na a tlinna Silver Jubilee (1996-2021) lawmna pui ber Silver Jubilee Celebration Organizing Committee buatsaih chu vawiin khan Environment Forest & Climate Change (EF&CC)  Minister Pu T.J. Lalnuntluanga, MLA Champhai South AC  chuan khuallian niin a hmanpui a, Health & Family Welfare Board Vice Chairman Dr. ZR Thiamsanga, MLA Champhai North AC chu khualzahawm a ni. 

Khuallian Pu T.J. Lalnuntluanga  chuan Govt. GM HSS in kum 25 na hmel a lo hmu ta chu a lawmpui takzet thu leh mahni Sikul chhuahna leh ngaih tak maia hun pawimawh  hmang  theia Zirtirtute leh Organising Committee -te  duhsakna a chang chu lawmawm  a tih thu sawiin, Sikul   bul tanna tura tha lo thawhtute leh Sikul tana mi tangkai tak tak mual liam ta te a hriatreng thu a sawi a. Govt. G.M Higher Secondary School chu Mizorama School hlun leh lar, ram leh sakhaw tana mi pawimawh tak tak lo chawrchhuah tawhna hmun leh Mizoram tana malsawmna thlentu pawimawh tak a nih thu a sawi a. Mizoram-in a mamawh ber chu thil kan ngaihtuah dan leh kan rilru sukthlek tihdanglam a nih thu sawiin,a tha zawng leh a eng zawngin ngaihtuahna nei ila, chu chuan kan nunah beiseina nung min siam sak thin a ni, a ti a. Mimal leh chhungkuaa harsatna tawhte chu hmasawn nan leh chhelna thlentu atana hman thiam a pawimawh thu sawiin, vuivaina nei tam mi aiin midangte pui tam ho hi khawvela mihlim leh awhawm berte chu an ni, a ti a. Ngaihtuahna eng kan neih loh chuan a tuartu tur chu keimahni kan ni a, kan ram leh a chhunga chengte kan ni, a ti bawk.

 Nakin lawka ram leh hnam innghahna  tur leh sorkar hna pawimawh tak tak chelh tur Zirlai kalkhawmte chu Zoram hmel thar lan tir tura ngaihtuahna siam thar tur leh rilru dik pu chunga an theihna leh thiamna te hmang turin a fuih a.  Hmasawn turin hmanraw tha leh changkang ber ber kan mamawh rualin kan mamawh ber chu rilru dik put hmasak hi a ni, a ti a. Rilru puthmang kan siam dik hmasak zet hnuah hmasawnna dangte hian a rawn zui mai dawn a, tihtur tih mai a, tih loh tur tih loh maite hi kan moral siam dikna tur a ni, a ti bawk. Zirlai kalkhawmte chu thillo thlengte sawiseltu ni ringawt lova, rawtna thlentu ni thei zawk tur leh eng hna pawh thawk se mahni hmazawn zelah midangte tana malsawmna  thlentu  nih tum tur leh,  zirtirna pe chhawnga, entawn tlak ni zawk turin a chah a. Govt. G.M HSS Champhai chu mitha tam tak chherchhuaka malsawmna Sukul ni zel turin Silver Jubilee pualin a duhsakna a hlan  a ni.  

 Khualzahawm  Health & Family Welfare Board Vice Chairman, Dr. Z.R Thiamsanga, Champhai North bialtu MLA ni bawk chuan Zirna hi kawng engkima hmasawnna a nih angin Govt. G.M Higher Secondary School chuan ram leh khawtlang, sakhaw hruaitu mi tam tak a lo chher chhuak tawh a ni, a ti a. An hmaa mihuai kaltate hre reng chunga theihtawp chhuah chhunzawm zel turin Zirlaite leh Zirtirtute a chah a. Hlawhtlinna tura kawng pawimawh ber chu tumruhna a nih thu leh nu leh pa leh Zirtirtute thuawih chu Pathian pawhin mal a sawm thin thu a sawi a. Dr. Z.R Thiamsanga chuan Champhaia zirnain hma a sawn theihna tur te, Mizoram Civil Service mai ni lo, Central Service thleng phak an awm theihna turin MYC hmalakna hnuaiah IAS Coaching Centre hawn tuma hmalak mek a nih thu a sawi bawk. 

Jubilee lawmna hunah hian khuallian Pu T.J. Lalnuntluanga'n Digital Library a hawng a,  khualzahawm Dr. Z.R Thiamsanga'n Jubilee lungphun hawngin, Director of School Education Pu James Lalrinchhana'n Jubilee Souvenir a tlangzarh a, Pu Vanlalhruaia  Sailo, Principal  kalchhuak tawhin Jubilee tuichhunchhuah a hawng bawk a ni. 

Silver Jubilee lawmna kalzelah naktuk hian hemi Sikul atanga zirchhuak tawhte pualin hun hman a ni ang a, Jubilee lawmna hi khar a ni ang. Govt. G.M Higher Secondary School hian kum 25 an tlin champhaphak pual hian Champhai District Hospital Blood Bank-ah thisen an lo pek tawh bakah Champhai khawpui chhung an ti fai tawh bawk a. Govt. G.M Higher Secondary School hi June, ni 25, 1996 khan din a ni a. Tun dinhmunah hian Zirlai 730 leh Zirtirtu 27 an awm mek a. Arts, Science leh Commerce zirna bakah  Vocational Course pathum; Horticulture, Health Care leh Computer Technique-te a zir theih a ni.

Attachment

  • Loading attachment...