2078/2024-2025

Dated Aizawl, the 16th September, 2024: Vawiin khan Chief Minister Pu Lalduhoma chuan a office-ah Mizoram Commercial Vehicle Union hruaitute a kawm a, an harsatna te a sawipui. Chief Minister hi Pu Vanlalhlana, PWD leh Transport Minister, Pu TBC Lalvenchhunga, Adviser to CM (Finance) leh PWD Official pawimawhten an tawiawm.

Chief Minister chuan, kuminah India ramin ruahtui kan dawng tha a, tuilian leh leimin a tam a. Chhiatna pawh kan tawk nasain kawngpui then fel nan pawh hian sum leh pai a kal tam hle. Hei hi kan tum anga hma kan lak chak theih loh chhan ber a ni, a ti a. Ruahtui vanga kan harsatna te min hriatthiamsaka min lo ngaichang hram hram turin kan ngen che u a ni, tiin Sawrkar hmalak dan te a lo hrilh. Kawnpui leh Khamrang inkar hi chu remchang hmasaberah keimah ngeiin tlawh ka tum a ni, a ti.

Tuna Mizoram chak lakna kawngpui chhe zual lai Kawnpui leh Khamrang inkar hi Satguru te thawh a ni a, maintenance period ah a lut mek a, May 2026 thleng awh tur a ni. An maintenance period a nih miau avangin NHIDCL in a laksak duh si lova, tun hi a thleng ta a ni.

Sawrkarin an contract tihtawpsakin an maintenance fund awm ang ang hi vawiinah Mizoram PWD account-ah a luh beisei a ni a. Chung sum te leh state sumte nen chak taka umzui a ni. Hnathawktu hi hlawm thumah dah an ni a, vawiinah pawh lung trip 20 an thlen hman ang.

Kawng chhiat vanga tuna Sumo Service te an chawlhna zawng zawng hi Lung hnawha tlan theiha a rang lama siam tura an ngenna chu a theih chen chen bawhzui nghal a ni dawn a. Kawng chhia vanga Sumo Service chawlhna te a rang lama inhrilhhriat ni se, an ti.

Manipur chak lak luhna Kawlkulh leh Hliappui inkar kawng hi sawrkar chuan PMGSY 3 hnuaiah siam thar vek turin contractor thar kutah a hlan tawh a. Tuna lung hnawh nghal ngai leh lirthei tang nawrchhuaktu tur JCB pawh contractor hnena ngen tha an ti.

Commercial Vehicle Union hruaitute hian kawngpui tha tawk lo vanga harsatna an tawh thu bakah tuialhthei man sang chungchang te, lirthei kaihhnawih chhiah chungchang te, fitness test thu leh state dang atanga private car hmanga rinhlelhawm taka rawn vak vel an tam thu leh a ngaihpawimawh thil dang te an thlen a.

Heng an thil thlen dang te pawh hi a bawhzui dan tur an sawiho a ni.