2079/2024-2025

Dated Serchhip, the 16^th September, 2024: Vawiin khan Serchhip ICDS Project te bultumin Rashtriya Poshan Maah 2024 (National Nutrition Month 2024) September thla chhunga hmanna kal zelah POSHAN WALK & ECCE FESTIVAL Serchhipah hman a ni.

Serchhip khawpui chhunga Anganwadi naupang te leh Anganwadi-a thawktu te bakah Serchhip Field Veng Branch YMA Chhang ten POSHAN WALK & ECCE FESTIVAL ah hian  P&E Bazar kawn atanga Leisekawt Field thleng 'Poshan Walk' kawng an zawh a, hriselna tha kan neih theih nan leh naupang thanglai than titha thei tura   thlai leh thei lam ei tam a tulzia te an aupui a ni.

Pi Caryll Lalpari, CDPO, Serchhip ICDS Project chuan naupangte tana infiamna pawimawh zia leh, an thanlenna atan te, thenrual kawm an zirna atan te, tawng an zirna atan te leh an thluak leh rilru hrisel taka an than chhhohna atan infiamna hi a pawimawh em em a ni, a ti a. Tunlaia naupang inawm lemna changkang chi hrang hrang te hi man to tak tak a nih hlawm avangin nu leh pa te tan phurrit a nih theih thu te sawiin, Mizo infiamna leh inawmtleina chi hrang hrang te zir thar lehin; naupangin nuam ti taka an infiampui theih tura zirtir thar leh a tul thu a sawi. Tunlai naupangin kamram leh hmawm sawm atana an ei nasat em em, vai thil siam hrang hrang leh ram pawn atanga lak luh te hi a tam zawk chu hriselna atana tha lo leh hang tak tak te an nih hlawm avangin ei tam tir loh a that thu te sawiin, kan ram thlai thar chhuah te bakah thei lam te ei uar ila, kan lo hrisel zawk dawn a ni tiin kalkhawm naupang te chu ei tur tha leh hrisel ei uar turin a fuih bawk.

He ECCE Festival-ah hian Mizo naupang infiamna chi hrang hrang: Kalchhet kal, Zawnga leihlawn, Inkawibah, Arpa insula, Inhruipawh, Insuknawr, Insaipui pawh, Inbawl vawm, Sakuh Ui Lut, Inzuan san siak, Inhruai zuan, Ketami Nu Intlansiak, Naupang pipu uai, Inkezungpui pir, Kaihbu, Inlung vawr, Innap leh Inhnawk te hmangin infiamna neih a ni.

Kumtin September thla chhunga hman thin ‘Rastriya Poshan Maah’ hi kuminah pawh 1^st Sept - 30^th Sept. chhung hian Women & Child Development Department bultuma hman mek a ni a. Nu leh naupang te ei chhiat lutuk avanga natna leh retheihna um bo tumin kawng hrang hrangin hma an la a. Sawrkar Department hrang hrang nena tangkawpin ei leh in tha inkawhhmuhna hun te, naupangte thisen HB test te, hnute tui inpek dan te, naupang te hriselna atana ei chi leh ei loh tur chi inhrilh hriatna te, naupang than thu (thang tha thei lo) zawn chhuah (an rih zawng bukna hmanga zawn chhuah) te, hun bi taka thil eiin a pawimawh zia inzirtirna hun atan September  thla hi kum tin hman thin niin, heng inzirtirna te hi ram pumah Anganwadi Centre kal tlanga kalpui  thin a ni.

‘ECCE Festival’ hawnna hun tawi hi Pu Calvin Lalngaihsanga, ICDS Staff chuan a kaihruai a, naupang kalkhawm te chuan Pu Lalnunthara ICDS Staff kaihhruainain Thu tiam (Pledge) an sawi rual a ni.