2080/2024-2025

Aizawl, the 16th of September, 2024: Vawiin chawhma dar 10:00 khan Excise & Narcotics Minister Pu Lalnghinglova Hmar hovin BDO Conference Hall, Darlawnah ruilhhlo do chungchang hmalak zel dan tur sawi hova inrawnkhawmna neih a ni a. He hunah hian Darlawn khawchhunga Sawrkar Department hrang hrang, tlawmngai pawl, Kohhran leh Kohhran thalai pawl hrang hrang aiawhte an tel a ni.

Excise & Narcotics Minister Pu Lalnghinglova Hmar chuan ruihhlo do chungchanga Sawrkar hmalakna hrang hrangte tarlangin, Darlawn khawtlangin ruihhlo do an kalpui zelna turah Sawrkarin theihtawp chhuahpui a inhuam thu a sawi a; Kohhrante pawh hemi kawngah hian nasa lehzual zawka hma la turin a ngen a. Zirna in, school leh college-ahte ruihhlo ti lo tura inzirtirna nasa zawk kalpui a tul thu sawiin, zirtirtute pawh tan la thar leh turin a ngen a ni.

Pu Lalnghinglova Hmar chuan ruihhlo do kawngah Department hrang hrangte thawhho a tul thu sawiin, “Ruihhlo do kawngah YMA chuan theihtawp chhuahin tha pawh an thawh hnem a, chutih rualin VC, Kohhran leh MHIP te pawhin ngaihtuahna thuk zawk kan senpui a tul a, hlawhtling tur chuan kil hrang hrang atanga thawhhona tha neih a tul a ni” a ti a. Excise Minister hian Darlawn khawtlangin ruihhlo dona kawnga an hman atan Rs 10,000/- (Cheng sing khat) a hlan a ni.

Inrawnkhawmna hunah hian kalkhawmte atangin Darlawn khawtlang leh a chhehvela ruihhlo leh ruihhlo ngaite dinhmun tarlan a ni a. Ruihhlo Do kawnga hmalakna awm mek leh harsatna an tawh hrang hrangte sawi chhuah a ni. Ruihhlo do kawngah Sawrkar, khawtlang leh Kohhran tanrual a tulziate sawiho a ni bawk.

Vawiin hun hman hi Pu N. Lalzarzova, Block Development Officer, Darlawn RD Block chuan a kaihruai a. Minister tawiawmtu Pu Vanlalvura Ralte, Asst. Commissioner, Excise & Narcotics Department chuan thu a sawi bawk a ni.