1074/2022-2023
Aizawl the 28th June, 2022: Chief Minister Pu Zoramthanga chu vawiin khan Mizoram Cooperative Apex Bank Annual General Assembly vawi 27-na, Vanapa Hall-a buatsaihah khuallian niin hun a hmanpui. Cooperation Minister Pu C. Lalrinsanga chu khualzahawm a ni.

Chief Minister chuan Apex Bank chu tha taka hna thawk, scheduled bank ah pawh lut mai thei tura chhawpchhuah mek a ni thei chu lawmawm a tih thu a sawi a. Mipui rawng an bawl naah theihtawp chhuah zel turin a chah a. Tun hmaa banking system that tawkloh avanga cooperative bank ten harsatna an tawh dan kha hre rengin, a kalphung ah fimkhur zel pawimawh a tih thu sawiin tanna tha a tan tawh chu thawktu zawng zawng leh shareholder zawng zawng ten veng vek turin a chah a ni. Chief Minister chuan hlawhtling tur chuan a bul taka cooperative society in a tum ber kan hriat chian a ngai a ni, a ti a. Cooperative society chu a chhung a mite zing atanga insiam chhuak a, lo thang chho zelin hlutna neia, society member-te tan hlawkna lo hring ta thin tur a nih thu a sawi a. Chutiang nilo a, a chhip atanga intan a nih chuan ke neilo in a ding ang a, sawrkar department pakhat ang maia ngaia grant leh loan zawng a a kal chuan hun reilote ah a in ei da ral leh mai thin thu a sawi a ni. Chief Minister chuan mipuiin kan ramin malsawmna a dawn - lei ngheng a eizawnna, intodelh mai bakah hausakna tham asset a neih hi taima leh remhre taka hman tangkai nachang kan hriat a, hma kan lak pawimawh a tih thu a sawi bawk.

Cooperation Minister pawhin thu sawiin, cooperation movement pawimawhna leh he movement hlawhtlinna tur chuan rinawmna leh taimakna a pawimawh thu a sawi a. Inpekna tak tak nen kalpui a ngaih thu leh 'mahni in hlawkna changlo pawh ni ila midang chuan chang rawh se' tih rilru put te, tanrualna leh nasa taka ram tan inpekna rilru put a pawimawh thu te a sawi. Cooperation Minister chuan Act and Rules ngaihpawimawh tha a tih thu sawi bawkin, MCAB thawktu leh shareholders kalkhawmte chu nasa leh zuala achievement tha tak a neih zel a duhsak thu a sawi a ni.

MLA Pu K. Laldawngliana, Industrial Development Board Vice-Chairman pawh he hunah hian a tel a. Conference hi Pi T. Lalmuanpuii, MCAB Ltd. Chairman chuan kaihruaiin, CEO Pu Lalzuahliana chuan report a pe a. An hruaitu zinga mi nunna chan ta sunna hun neih a ni bawk a. Vice-Chairman Pu R. Rodingliana chuan lawmthu sawiin hun a khar a ni. Chawhnu lamah rorel in chhunzawm a ni.

MCAB Ltd. hi kum 40 a upa a ni tawh a. Bank inrelbawlna hi Board of Directors kuta awm niin Board of Directors ah hian member sawm (10) an awm a ni. Bank branch 22 awmin, CBS a thlunzawm vek an ni a. Mizo tawnga hman theihna ATM 22 leh Mobile ATM Van 2 an nei mek bawk.

Attachment

  • Loading attachment...