1073/2022-2023
Champhai, the 28th June, 2022: Champhai District chhunga Bank hrang hrang kaltlanga hmalaknate thlirletin District Consultative Committee (DCC) chu vawiin chawhma dar 11:00 khan an Chairman, District Bawrhsap Pu James Lalrinchhana hovin DC Conference Hall-ah an thukhawm. He hunah hian March 2022 quarter tawp thlenga Champhai District RD Block 2 huamchhunga Bank leh Stakeholder hrang hrangte hmalakna thlirho a ni.

District Bawrhsap chuan DCC Member-te chu mipuite tanpui leh rawngbawlsak tur an nih tih inhrereng chunga theihtawp chhuah tur leh, district hmasawn nana mi pawimawh an nih anga thahnemngai taka thawk turin a chah a. Mimal chauh ni lo kan zavaia thanna tur ngaihtuah tel a tul thu sawiin, bank thawktute chu mi hnuaihnung leh rethei berte khaichhuaka pui theitu an nih avangin ngaihtuahna zau tak seng fo turin a fuih a. District mipuite chu bank dawr hrehlo tur leh loan lakte tha taka rul thin turin a chah bawk a ni.

DCC Chairman ni bawk chuan bank-te chu ngaihtuahna zau zawk senga pawisa dahluh dawn mai bakah loan pekchhuah kawnga tanla zual sauh sauh turin a chah a. Bank-a sum dahluh leh mipui tana pekchhuah inthlauhna Credit Deposit (CD) ratio hniam lutuk thin chu veiawm tiin, CD ratio a hniam chuan than a ti thu a, hemi kawngah hian tanlak chhunzawm zel a ngai dawn a ni, a ti a. An hmalakna kawnga harsatna an neihte hotute hnena thlen hreh lo turin a chah bawk a. Hmasawn turin lungrual taka thawhho leh tanrual a tul thu sawiin, kan zavaia kan tantlan tlat chuan hlawhtlinna duhawm tak kan chang thei dawn a ni, a ti a. Thutkhawm leh hunah hmasawnna dang hmuh ngei a beisei thu a sawi bawk.

Pu Jyoti Munna Soren, Lead District Manager (LDM), SBI Lead Bank Office Champhai chuan kalkhawmte lawmna thu a sawi hnuah quarter kalta chhunga Champhai District Bank leh Stakeholder hrang hrangte hnathawh leh hmalaknate thlirletna neih a nih bakah hmachhawpte sawiho nghal a ni.

Meeting-a tarlan a nih danin March 2022 quarter chhunga Champhai District-a Bank hrang hranga pawisa dahluh leh pekchhuah tam zawng inthlauhna khaikhinna Credit Deposit Ratio/CD Ratio chawhrual chu 65% a ni a, quarter hmasa December 2021 quarter tawpa CD Ratio 59.67% atangin 5.33% in a pung a, hei hian CD ratio tha ni tura hniam lam bituk zat 60% chu 5% in a khum a ni. Hemi hun chhung hian Bank-ah cheng nuai 48375.57 dahluh a nih laiin Bank-in pawisa a pekchhuah zat hi cheng nuai 31445.61 a ni. 2021-2022 Financial Year chhunga Annual Credit Plan (ACP) hnuaia hnathawhte thlirho ni bawkin, Priority Sector atana target cheng nuai 13010.70 atangin cheng nuai 15730.03 (121%) hu tihhlawhtlin a ni a, Non Priority Sector hnuaia target cheng nuai 1364 atangin cheng nuai 4557.56 (334.13%) hu tihhlawhtlin a ni. Hemi quarter chhung hian Pradhan Mantri Mudra Yojana (PMMY) kaltlangin Sishu hnuaiah mi 13, Kishore hnuaiah mi 130, Tarun hnuaiah mi 42, Stand up India hnuaiah mi 16, an vaiin mi 201 te hnenah loan cheng nuai 840.60 hu pek chhuah tawh a ni bawk.

Kumin March quarter tawp thlenga Social Security Scheme hnuaia inziaklut tawh zat chu Pradhan Mantri Jan Dhan Yojana (PMJDY) hnuaiah mi 21459, Pradhan Mantri Jeevan Jyoti Bima Yojana (PMJJBY) hnuaiah mi 9781, Pradhan Mantri Suraksha Bima Yojana (PMSBY) hnuaiah mi 15640 leh Atal Pension Yojana (APY) hnuaiah mi 781 an inziaklut tling tawh a. Hemi quarter chhung vek hian Priority Sector hnuaiah Non Performing Assets (NPA) cheng nuai 1319.45 (6.42%) leh Non Priority Sector hnuaiah NPA cheng nuai 773.74 (7.26%) awmin Bank chhawr tangkai dan inzirtirna Financial Literacy Campaign (FLC) Lead Bank leh Mizoram Co-operative Apex Bank (MCAB) te kaltlangin tum 14 neih a ni a, mi 425 te zirtirna pek an ni.

DCC thukhawm chuan District Hospital Champhaia ATM khawl bun a nih theih nan thuneitu sang zawkah dilna thlen tha a ti a. Bank hrang hrangte chu mipuite hnena Bank chhawr tangkai dan inzirtirna financial literacy camp thla tina vawi 2 tal nei tura hriattir an ni a, mipuiten Social Security Scheme an chhawr tangkai theih nan a tul anga hmalak nise tih a ni a. Heng bakah hian Bank leh ATM venhim chungchang sawiho niin security report ngaihthlak a ni a. Bank venhim kawnga tanlak ngai zualte chu Bank branch leh Police tangkawpte bawhzui tura tih a ni a. Currency Remittance chungchang pawh sawiho ni bawkin, Bank tinte chu quarter tawp ni atanga chhiara ni 15 chhunga data thehlut thin tur leh DCC thukhawm leh hmasak berah hotulu theuhte kokim zawka an tel theih nan hriattirna siam nise tih a ni bawk.

March 2022 quarter tawp thleng khan Champhai District-ah Bank branch hrang hrang 17 a awm a, Public Sector Bank 5, Private Sector Bank 5, Regional Rural Bank 6 leh State Cooperative Bank 1 te bakah ATM 9, Business Correspondent 8, CSP 1 leh IPPB hnuaia Banking Touch Point 26 te a awm a ni. Financial Literacy Centre 2 (Lead Bank Office, SBI Sponsored leh Champhai Financial Literacy Centre, MCAB Ltd.) te awm bawkin, Champhaiah RSETI (Rural Self Employment Training Institution) hranpa a awm loh avangin RSETI Aizawlin a vil a, Champhaia a awm theih nana hmalak tulte pawh sawiho a ni bawk.

DCC meeting zawh hian National Bank for Agriculture and Rural Development (NABARD), Mizoram Regional Office (RO) buatsaihin 'One Day Sensitization Meet with Bankers' Bawrhsap hova neih chhunzawm a ni a. He hunah hian Pi H.Lalhmachhuani, District Development Manager (DDM), NABARD Champhai chuan Potential Linked Credit Plan (PLP) chungchang a sawifiah a. NABARD hnathawh leh hemi hnuaia hamthatna awm hrang hrangte chhawr tangkai theih dan turte zirho a ni bawk.