1072/2022-2023
Kolasib dated 28th June 2022: Vawiin khan DC Conference Hall, Kolasibah District Development Monitoring & Coordination Committee Meeting neih niin Pu C.Lalrosanga, Member of Parliament (LS) chuan Video Conferencing kaltlangin a kaihruai a. Kolasib District huam chhunga hmasawnna hna department hrang hrangten an thawh tawh leh thawh mekte thlir hona hun neih niin Pu K.Lalrinliana, Minister, FCS & CA, Kolasib Assembly Constituency bialtu MLA leh Pu K.Laldawngliana, MLA, Tuirial Assembly Constituency-te pawh an tel a ni.

Pu C.Lalrosanga, MP (LS) chuan sawrkar laipui ruahmanna a Department hrang hrang kaltlanga hmasawnna hna Kolasib district-ah thawh a ni chu lawmawm a tih thu sawiin hmasawnna inkhairual tak a awm zel theih nan leh hmasawnna hna tithuanawp leh tikhawtlaitu ni lo turin kalkhawmte a chah.

Pu John LT Sanga, Deputy Commissioner chuan Kolasib district chhunga Rail kawng siam mekte dinhmun tarlanna hun hmangin NHIDCL hnuai a 4-Lane siam tur chu a tul ang angte peihfel a nih a leivung paihna tur mumal tak ruahman a nih hnu ah chauh hna kalpui tur a nih thu a sawi.

Vawiin thutkhawma tarlan danin Mahatma Gandhi National Rural Employment Guarantee Scheme (MGNREGS) hnuai ah kum 2021-22 chhung khan mi 20,497 hnen ah ni 97 inhlawhna siamsak niin hna 1,388 thawh a ni a, kumin May thla thleng khan ni 21 inhlawhna pek a nih thu tarlan a ni a. Hna zawhfel tawh, hna kal mek leh hna thawh tan tur felfai tak a chhinchhiah hna, Geo-Tagging 5,900 kalpui tawh a ni. Kolasib district-a Self Help Group 757 awm mek ten eizawnna ngelnghet an neih theih nan Training hrang hrang pek an nih thin bakah eizawnna bultan nan Cheng nuai 1262.7 loan pekchhuah a ni tawh bawk a ni. Insak tanpuina, PMAY-Housing For All (Urban) hmangin Kolasib, Kawnpui, Bairabi leh Vairengteah 1st Installment mi 1672-in an dawng tawh a, Kawnpui leh Kolasib khaw chhungah mi 414 in 2nd installment dawng tawhin 370 in 3rd installment an dawng tawh bawk a ni.

Pradhan Mantri Gram Sadak Yojana hnuai a Bilkhawthlir leh North Chawnpui inkar kawng leh Rengtekawn leh Builum inkar kawng siamte chu March 2022 khan zawhfel tawh a nih thu tarlan a ni a. PMGSY hnuai a kawng siam tur ruahmanna awmsa 5 bak ah Khamrang – Hortoki, Kawnpui – Hortoki leh Kawnpui – Mualvum panna kawng siam leh thawmthat hna kalpui turin ruahmanna a awm thu tarlan a ni.

Kolasib district chhunga khaw 21-ah Jal Jeevan Mission kaltlangin kum 2021-22 chhung khan tui intur herh haw theihin in 965 thlunzawm (Functional Household Tap Connection) a ni a, Swachh Bharat Mission (Gramin) hnuai a khua 34 thlanchhuahte hnenah thianghlimna leh faina kawnga hmalakna hna kalpui mek a ni. Deen Dayal Upadhyaya Gram Joyti Yojana (DDUGJY) kaltlangin khaw panga thlanchhuah ah Electric thlunzawm a ni a, Buhchangphai leh Phaisen inkar a 11kv line kalna siamthat hna te thawh a ni. Bilkhawthlir 33 kv Sub-Station leh Kolasib Sub-Station-ah 33kv leh 11kv Feeder metering hna kalpui mek a ni bawk.

District Agriculture Office kaltlanga Pradhan Mantri Krishi Sinchayee Yojana, Rastriya Krishi Vikas Yojana, National Mission for Sustainable Agriculture, National Food Security Mission, Rainfed Area Development Programme leh National Mission for Oilseeds & Oilpalm hnuai a hmalaknate ngaihthlak niin Kolasib district atangin kumin May 2022 thleng khan Oil Palm rah (Fresh Fruit Bunch) Metric Ton 15,300 vel hralh tawh anga chhinchhiah a ni.

Kolasib district chhunga Bank hrang hrang awmten Sawrkar laipui scheme an kalpui dan te ngaihthlak niin March 2022 thleng khan MUDRA loan 1,311 pekchhuah a nih thu tarlan a ni a, Pradhan Mantri Jan-Dhan Yojana (PMJDY) ah 20,904, Pradhan Mantri Jeevan Jyoti Bima Yojana(PMJJBY) ah 12,266 leh Pradhan Mantri Suraksha Bima Yojana(PMSBY) ah 21,842 an awm thu leh Renewal pawh kalpui zel a nih thu tarlan a ni.

April ni 1, 2021 leh March ni 31, 2022 chhung khan khum 60 awmna District Hospital, Kolasibah dam lo enkawl 2,592, OPD-a in entir 13,670, Casualty-ah 5,217 an awm thu tarlan a ni a, chawhrualin mi 1,139 in thlatin OPD hi an dawr a ni. Nau piang 826 zinga 102 chu zai chhuah a ni a, kum kalta chhung khan thlatin nau piang 69 awm ang a chhut a ni. Hepatitis C mi 1,011 atanga endikna kalpui zinga zaa 4.7 chuan an kai tih hmuhchhuah a ni a, thisen 22,135 endik atanga za zel a 0.38 ah Malaria hrik hmuhchhuah a nih thu tarlan a ni bawk. Mizoram Health care Scheme hnuai a inziaklut chhungkua 6,398 awmin AB-PMJAY hnuai ah mi 45,711 inziaklut an awm mek bawk a ni.

Samagra Shiksha, Land Revenue & Settlement Department, District Civil Supplies Office, BSNL, Social Welfare Department kaltlanga hmalaknate pawh vawiin DISHA meeting-ah hian thlir ho a ni.