Mizoram chhunga District leh Civil Sub Division inrelbawlna tihchangtlunna tur atana buatsaih, Conference of District Commissioners and Superintendents of Police chu vawiin khan Chief Minister Pu Lal Thanhawla chuan Legislative Assembly Annexe Conference Hall-ah a hawng. He hunah huan Home Minister Pu R. Lalzirliana, Finance Minister Pu Lalsawta leh Revenue Minister Pu R. Romawia te an tel bawk.

Chief Minister Pu Lal Thanhawla chuan Mizoramin mahni hna a tui leh thahnemngai tak tak district hotu officer naupang tak tak Mizoram in a nei chu lawmawm a tih a sawi a. Mizoram sawrkar chuan district inrelbawlna thuamchak turin kawng hrang hrangah hmalakna a kal mek thu sawiin, mawhphurhna sang zawk inpek pawh tul a tih thu a sawi a. Hriselna, zirna, inkalpawhna leh mi harsate chhawmdawlna lan hmalaknate chu ngaipawimawh lehzual tura a duh thu sawiin Chief Minister chuan sawrkar scheme te hi mipui tana hriat awlsam leh awlai thei ang bera kalpui thin ni se a ti a. Mizoram chu ruah a sur tam thin avangin leimin te a tam a, disaster management lamah pawh DC leh SP te mawhphurhna a tam thin thu a sawi. Mizoram chu ram dang pahnih nen inthenawm a nih avangin ruihtheihthil, ralthuam leh dan in a phalloh thil tam tak tawlh ruk a awm thin thu sawiin, border district a awmte mawhphurhna a san zual thu te leh sawrkar pawhin kawng hrang hrang ah chak taka hma a lak zel thu a sawi a, dan leh thupek kenkawhnaah SP te pawimawh na a sawi bawk. Pu Lal Thanhawla chuan kan hma lawk a inthlan lo awm turah ram hruaitu inthlanna muanawm leh felfai tak a awm theih nan DC leh SP ten theihtawp chhuah a, state dangte tana entawntlak inthlanna kan neih theih nan mahni mawhphurhna theuh tihlawhtling thei turin kalkhawmte a duhsakna a hlan a ni.

Home Minister Pu R. Lalzirliana chuan Mizoram chu state ralmuang leh nuam tak a nih thu sawiin, Mizoram Peace Accord ziah a nih atanga vawiin thlenga state leh rampum tan a himna hna thawh chhoh a nih dan a sawi a. Border state a nih avanga ram tan a thil pawi thei thil hrang hrang luhka pakhat a nih avanga police lamin theihtawp a chhuah dan te a sawi a. Thawhhona tha neih a pawimawh thu sawiin Home Minister chuan Conference of DCs and SPs chuan Mizoram tam rah tha a chhuah ngei a beisei thu a sawi a ni.

Finance Minister Pu Lalsawta chuan district inrelbawlna fawng chelhtute chu an thawhpuite nen thawhhona tha an neih pawimawh a tih thu sawiin, tun dinhmun a Mizoramin a mamawh dan ang zela ngaihpawimawh awm a tih thenkhat a sawi a. District a department ram thenkhat awm awl te chu tangkai zawka hman an nih theih nan chhinchhiah tura a duh thu te, Right to Public Service Act kenkawhna a DC leh SP ten an mawhphurhna hre reng tura a duh thu te sawiin, an awmna district theuh tan mipuite nen thawhko zel turin a chah a ni.

Revenue Minister Pu R. Romawia chuan land settlement chungchanga DC te mawhphurhna hrang hrang a tobul atanga sawiin, ram inchuh leh innek sak te awm thin hi a pawiin, hetiang harsatna awm thin te hi sukiang turin sub divisional officer te hnenah mawhphurhna tam zawk pek tha a tih thu te a sawi bawk a. DC te chu hmasawnna hna an thawh thin bakah district hotu ber an nih angin district a head of office dangte nen inpawh tak leh inlungrual taka an thawhho thin a duh thu a sawi bawk.

Vawiin programme hawnna inkhawmah hian Chief Secretary Pu Arvid Ray chuan kalkhawmte lawmna thu sawiin, Pu Ashish Kundra, GAD Commissioner & Secretary chuan Mizorama District Administration leh Civil Sub-Division tihchakna atan hmalak ngaite a sawi a. District hrang hrang DC ten presentation an pe a. Aizawl DC Dr. A. Muthamma chuan " District Initiatives in the Schools of Aizawl" tih thupui hmangin thu a sawi a, Champhai DC Dr. Naveen Aggarwal chuan "Options for Fighting Drug Addiction" tih thupui hmangin thu a sawi. Lawngtlai DC Pu N. Chakhai chuan "Rhododendron Festival 2018" chungchang a sawi a, Lunglei DC Dr. Ankita Chakravarty chuan "Lunglei District  Administration Initiatives" chungchang sawiin, Mamit DC Pu Bhupesh Chaudhary chuan "Aspirational District" chungchang a sawi bawk. Kolasib DC Dr. Arun T. chuan "Perspectives of District Administration" chungchang sawiin, a hmalakna hnuaia Kolasib chhunga sawrkar hnathawkte attendance awlsam zawka chhinchhiahna tur Mobile Phone application pahnih - “Chhinchhiahna” leh “Kehniak” chu khuallian Chief Minister chuan a tlangzarh sak nghal a ni.

DC leh SP te intawhkhawmna hian ni hnih chhung awhin, ram chhung venghimna chungchangte, ILP, Border Issues te, district magistrate leh police inkara thawhhona tha neih te, sawrkar laipui programme kalpuinaa DC te mawhphurhna te sawiho in vawiin hun hi hman a ni a. Programme hi Pu Vanlalmawia, GAD Joint Secretary in lawmthu sawiin a khat a ni.

Naktuk (September ni 11) hian Aijal Club Conference Hall-ah inkhawm hi neih chhunzawmin, Revenue Administration leh Disaster Management chungchang sawihona neih tur niin, state pawn atanga IAS lo kal te - Daman DC, Goa IT Director leh Goa Public Service Commission Secretary te hnen atangin thusawi ngaihthlak a ni bawk ang.