502/2022-2023

14.5.2022: Chief Minister Pu Zoramthanga chuan Mizoram Engineering Service Association (MESA) ten an pawl kum 50 tlin lawmna Golden Jubilee Celebration Multipurpose Hall, Beraw Tlanga vawiina buatsaih chu khuallian niin a hmanpui.


Chief Minister chuan MESA golden jubilee lungziak hawngin, Golden Jubilee kum an hmang thei chu a lawmpui thu a sawi a. Kum 50 an tlinna chu an hmabak atan chona lo ni se a tih thu a sawi bawk. Chief Minister chuan ram hmasawnna atan pawimawh pakhat chu tuna kan rama awmsa hmang thiam a, kan neih sa te tangkai lehzual zawka hmanga ram hmasawnna atan chan thiam a nih thu a sawi a. Mizoramin chutianga kan neih, tangkaia hman theih (asset) te chu a mipui (human resource) te, a chhunga cheng mipui chawm zo khawp ram zau te, sik leh sa nuam tak te, ruahtui tha tak leh adangte, a nih thu leh, chung asset te chu kan ngaihtuahna leh kan thil thlir dan kan tihdanglam chuan nasa takin hma a sawnpui theih thu a sawi. Kawlphetha (Energy source) lamah la explore loh, mahse theihna (potential) kan neih si tam tak a awm tur thu te, chutiang bawkin inkalpawhna lama hmasawnna tur la awm leh hmasawnna ruhrel tam tak din theih a la nih thu sawiin, chung chu kan engineer te tan chona ni se a tih thu a sawi a. Chief Minister chuan vawiina kalkhawmte chu an hna theuh ah theihtawp chhuah a thawk zel a, ram intodelh kan nih theih nan kan resource neih te hi hman tangkai a nih nan engineer rualte a sawm a. Mizoram hmasawnna atan an thiamna leh remhriatna te hmang turin, ram nuam taka kan ram hi kan siam thei a ni tih hre reng turin MESA golden jubilee chu hmasawnna lungphum pawimawh tak a nih a beisei thu Chief Minister chuan a sawi a ni.

MESA Golden Jubilee lawmna inkhawm hi an President Er. Lalropuia chuan kaihruaiin, General Secretary Er. Benjamin L. Tlumtea hnen atangin report ngaihthlak a ni a. MESA dintute chawimawina Chief Minister chuan hlan in, an aiawhin Er. Ramhluna Khiangte chuan thu a sawi a. MESA dintute zing ami Er. P Lalchhunga chuan MESA DIRECTORY a tlangzarh bawk. MESA hruaitute chawimawina hun leh member kalta mi 76 sunna hun hman ni bawkin, Vice-President Er. H. Zoramliana chuan lawmthu sawiin hun a khar a ni.

MESA hi May ni 14, 1972 khan din niin, Mizoram Union Territory a lo nih tak avangin Assam Engineering Service Association atanga inla hrangin Mizoram Engineer te puala din a ni a. Mizoram Assam member te hi Degree Engineer sawrkar office hrang hrang leh hmun danga thawkz member ni duh te a huam a. Engineer leh Architect sawrkar department - PWD, PHED, P&E, I&WRD bakah H&TED, RD, UD&PA, Police, C&ID etc. hnuaia thawkte leh private a thawkte an tel a ni. Tun dinhmunah member ni mek 383, member pension tawh 31, member boral tawh (service lai leh pension tawh) 76 leh member ni thin ni tawh lo 31 an awm a ni.

Attachment

  • Loading attachment...