Vawiin chawhma khan Mizoram Chief Minister Pu Lal Thanhawla chuan Tourist Lodge, Chaltlang ah Mizoram Finance & Accounts Service(MF&AS) Associationkhawmpui lian vawi 22-na a hmanpui.

Chief Minister Pu Lal Thanhawla chuan Mizoram sawrkar chu mipuite ban phak, langtlang leh rinngam sawrkarah siam mek a ni a ti a. Sawrkarin sum lamah harsatna nei mahse hmasawnna tura hmalakna kawngah chuan inrenchem a tum lo a ti. Rambuai avanga kum 20 midangte hnunga kal tawh Mizoram chuan midangte ruala ke a pen ve theih nan sum enkawlna felfai leh sum hmanchhuah dan tur ruahmanna awmze neia hmasawnna ruhrel a duan a ngai a; chumi kawngah chuan Finance leh Planning Department te chu mawhphurhna pawimawh tak neitute an ni a ti.

Chief Minister Pu Lal Thanhawla chuan project siam leh thehluhah Mizoram in harsatna liantham a neih tawh loh thu sawiin hnathawhna tur sum Central sawrkar atanga rawn lut tawh te pek chhuah erawh; kutlinglova sum hmuh tumtute avangin tihkhawtlai a ni fo thin chu thalo a tih thu a sawi a. Sanction theitu te chuan Financial Control hnuaia inkaihhruaina bihchiang hmasain hnathawhna tur sum te chu pekchhuah a hun veleh an pe chhuak nghal zel tur a ni a ti a. Finance Department leh Planning Department official te chuan Department tuan muang deuh te nawr kal leh kaihhruai an mawhah la se tha a tih thu a sawi a. Sawrkar chuan Mizoram hmasawnna tura tha a tih chu a thlawp zel tur thu sawiin GST leh Demonetisation of Rs 500 and Rs 1000 Currency Notes pawh ama mimal ngaihdan chuan Mizoram tana thil tha nia a hriat thu Chief Minister chuan a tarlang a ni.

Chief Minister chuan Sawrkar Treasury Office leh office thenkhatah te department leh mimal bill la tur ten harsatna an tawh thin thu sawi a ni fo chu thalo a tih thu a sawi a. Mahni thawhloh hlawh lak tum chu thilbawlhlawh a ni a. Tun sawrkar hian kuttlinglova sum lak tumna hi a dodal zel dawna, sawrkar hnathawk te phei chu mipui an mahni dawrtute tana sum beisei vanga harsatna siam sak lo turin kan inhriattir a ni a ti. Mithiam tam tak sawrkar tana thawh chak an awm mek a, department thenkhat ah hnahniam zawk thawk, an thiamna te sawrkar tana thawk thei lova an chunglam hotuten an awp beh te an awm tih hriat a ni chu pawi a tih thu sawiin enfiah a ni ang a ti a. Mizoram tana thawkve theia awm chu chawimawina nasa tak a ni tih hriat a pawimawh thu sawiin Chief minister chuan Sawrkar hnathawk te chu an hnathawhna hmunah theuh sawrkar neitu mipui tan thahnemngai chunga thawk zel tur leh an hnathawh chu an rawngbawlna a ngai turin a chah.

22nd Annual General Conference of Mizoram Finance & Accounts Service(MF&AS) Association hi hun 2 ah then niin Pu R.Lalbiakthanga, President, MFASA in a kaihruai a. Hun hmasa zawk ah hian MFASA Report Pu Thara Lungtau, Secretary, MFASA leh Pu Ramchhuana, Finance Secretary, MFASA te hnen atang ngaihthlak niin Pi C.Lalthanpuii, Vice President, MFASA aiawh in lawmthu a sawi a. Hun then 2-na ah hian MFASA hruaitu thar turte thlanna hun hman ni in an pawl inrelbawlna thil an sawi ho nghal a ni.