Vawiin hian Serchhip District Health Society Chairman, Bawrhsap ni bawk Dr. Lalrozama, IAS pisaah Serchhip District Health Society te chuan kum chanve thutkhawm an nei a, April – September chhunga hnathawhte thlirlet a nih bakah hmalak chhunzawm dan tur Action Plan duan a rel.

Chairman Dr. Lalrozama chuan, National Health Missions in a tum pui ber chu Infant Mortality Rate leh Maternal Mortality Rate tih hniam a ni a. Heng thil pawimawh em em pahnihte hi chhungkaw tinte faina, an thianghlimna, hriatna leh thawktute nena an inkungkaihnaah te a innghah avangin District chhunga mitin thleng phak, kan harsatna tawk mek va khawih pha, a hre tur dik takte hriat phak ruahmanna kan siam a ngai a ni, a ti. Bawrhsap chuan, hriselna leh thianghlimna kawnga sawrkar hmalakna teah chanchinbumite leh tlawmngai pawlten an tawiawm that thin avangin lawmthu a sawi a, heng hmalakna te hi nasa lehzuala kalpui chhoh tur a nih avangin inpawh tlang taka thawh ho pui zel atan a sawm bawk.

District Health Society Member Secretary Dr Laldawnglian Sailo, Chief Medical Officer ni bawk in kumin April-September inkara Serchhip District dinhmun report a pek danin, he mi hun chhung hian nau piang 385 an awm a, an zinga 15 te hi in lama hrin an ni. In lama hrin tam zawkte hian an inah an khaw Health Worker an pun hlawm. Nau piang zinga sen laia boral zat hi 10 an awm a, nausen boral 10 zinga 3 te hi in lama hrin te an ni. Ti hian Infant Mortality Rate chu 18.45/1000 tihna a ni. National Health Missions targetted Infant Mortality Rate hi 25/1000 a ni mek a ni. Maternal Mortality Rate hi zero a ni thung a, nu naupai, Hb 11 aia hniam erawh (Anemia neia ngaih) hi chu 56% an ni phak. Heti khawpa Anemia nei an tama a lan lai hian Severe Anemia (Hb 7% aia hniam) erawh an awm lo thung. Tin, High Risk Pregnancy hrim hrim hi an awm lo bawk.

Vawiina meeting chuan, nu naupai mekten damdawi an lak that dan te, ASHA leh Health Worker ten hna an thawh dan te, nausen boral san deuhna laite, hmanrua awm dante, inkalpawhna leh inbiakpawhna dinhmun te, Department dangte nena thawh ho theihna laite, mipui zirtirna kawnga chak zawka kal theih dan te chipchiar taka a thlir hnuah rawtna hrang hrang awmte behchhana Action Plan siam a rel a, he Action Plan hi tun thla chhunga peih hman tura tih a ni bawk. Hengte bakah hian Health Department kaltlanga sawrkar Programme leh Schemes hrang hrangte chu thlir ho a ni a, State Level a thlen tur chi engemawzat an sawiho bawk a ni.

Vawiina Meeting ah hian member te an kal tha hle a ni.