Nimin khan Pu Joseph Lalhimpuia, Parliamentary Secretary, Education Department, etc. chuan Pu Liandala, Darzo khua a a lo awm tawhna, a in hmun Darzo khawtlangin an humhalh chu a tlawh a, amah hriatrenga nana In sak leh ram pum huapa seminar buatsaih tura hmalakna te an sawiho.

Pu Joseph Lalhimpuia chuan Pu Liandala hriatreng nana a hmun leh hma humhalh a, Darzo khawtlangin In an sak sak avangin lawm thu a sawi a. Pu Liandala in hmuna changtlung zawka In sa tura engineer ten hma an lak dan te sawiin, ram pum huapa thu leh hla lama tui mite tan Khawbung leh Darzo ah seminar nei turin ruahmanna a awm thu a sawi a ni. He inhmuhkhawna ah hian Darzo Monument Committee ten an hmalakna te an tarlang bawk a ni.

Mizo zinga hla phuah thiam tia kan hriat lar Zirtirtu Pu Liandala hi kum 1900 khan Thiltlang khuaah a piang a. Kum 1922 atangin Khuanghlum Primary School leh Serkawn Middle School ah te zirtirtu hna a thawh hnu in, kum 1945-63 chhung khan Darzo Middle School Headmaster a ni a. Kum 1964-70 chhung Lunglei Government High School zirtirtu a ni leh a, kum 1973-80 thleng Zohnuai Middle School Headmaster hna a thawk leh a ni. Pu Liandala hi December ni 19, 1980 khan a boral a, hla 34 phuah in, hla lehlin 68 a nei a ni.