Vawiin khan ICFAI University (Mizoram) chuan an hmunpui Durtlang-ah 5th Convocation an hmang a. He hunah hian Mizoram Governor Lt Gen (Rtd) Nirbhay Sharma, PVSM, UYSM, AVSM, VSM chua Khuallian niin ICFAI zirlai hlawhtling 109-te zinga Gold leh Silver Medallist-te hnenah medal leh citation a hlan a ni.

Mizoram Governor chuan Graduate tharte fuihna thu sawiin vawiina an hlawhtlinnaah tawp mai lova, an nun bultanna a ni tih hriaiin theihtawp chhuah zel turin a chah a; tunlai khawvelah chuan mithiam leh chhawrtlak tak takte tan loh chuan hmun a awm tawh lo a ti. India chu ram thanglian chak tak a ni a, hnathawhna tur pawh a tam a, Mizo thalai lehkhathiam leh taima tak takte tan tun hun tha hi bawhna chang hria a, tumruhna nen ramchhung leh pawn thlenga hming chher thei an ni a ti bawk. Mizorama zirna tihhmasawnna kawngah ICFAI University chuan nasa takin tan a la mekna chungah lawmthu sawiin ‘quality education’ dah pawimawh zel turin a chah a. Sorkar pawhin mipuite tan theihtawp a chhuah zel a, zirna bakah skill dvelopment lamah nasa zawka hmalak mek a ni a, chuvangin zirlai leh thalaite pawh hmasawnna lo kal zel tur mila zirna leh thiamna pek a finthlaka a hriat thu a sawi bawk. Mizoram Governor chuan kan thiamna leh hnathawh danah hian kan mihringpuite, khawtlang, ramchhung leh khawvel pum thatna leh hmasawnna tura kan theihtawp kan chhuah zel hi kan mawhphurhna theuh a ni tih i hre reng ang u tiin kalkhawm zawng zawngte a chah a ni.

ICFAI University Vice-Chancellor Prof JP Ramappa pawhin thu sawiin kum 2006-a Mizoramh ICFAI Univeristy a din tirh atangin Mizoram sorkar chuan theihtawpin a thlawpna chungah lawmthu a sawi a; kum 10-a upa ICFAI University chu UGC recognised a nih tawh thu a sawi bawk. Tun dinhmunah ICFAI University chu private university-te zingah lian ber niin a hnuaiah University 11, Business School 9, Tech School 7 leh Law School 5 a awm a; Bachelor leh Masters level-ah program 20 awmin tun atanga reiloteah Masters program in Mizo Language an tan thei dawn tih a tarlang bawk a. ICFAI University Mizoram Campus chhungah B.Ed, Law leh program dangte zirna tur Block thar engemawzat sak hna an tan thuai tur a sawi bawk a ni.

ICFAI University Registrar Dr.Samuel L.Dingliana chuan lawmthu sawiin 5th Convocation hun a khar a ni.