Mizoram Fish Festival hmasa ber chu vawiin khan Chief Minister Pu Lal Thanhawla chuan Vanapa Hall-ah a hawng. He hunah hian Pu R. Lalzirliana, Minister Home, Agriculture, etc leh NLUP Nodal Minister ni bawk chu khualzahawm a ni a. Fisheries Minister Dr. B.D Chakma, Deputy Chief Whip Pu R.L. Pianmawia, Parliamentary Secretary Pu Hmingdailova Khiangte leh Parliamentary Secretary Lt. Col (Rtd.) ZS. Zuala te an tel bawk a. Fish Festival hi National Fisheries Development Board (NFDB) buatsaih niin ni thum chhhung a awh dawn a ni.

Chief Minister chuan sangha khawi chu eizawnna atana thil tha anih avanga Fisheries Department hmalakna in sangha khawitute leh a tui mite inkohkhawm a, tunlai thiamna hmanga sangha hlawk zawk leh hrisel zawk nih theih dan sawihona leh mipui hmaa phochhuahna hun buatsaih chu hlawkthlak taka hman a beisei thu a sawi a. Sangha khawi leh a humhalh kawngah pawh changkan kan pan chho zel chu lawmawm a tih thu sawiin, sangha khawi hi chaw tha pek bakah a leilung leh tui quality thlengin sangha ngeih tur ang ber hriat a tha a ni, a ti a. Chu chu mipui hnena inhrilhhriatna thehdarh chu Department tan pawh cho na ni se tiin, hmun hrang hranga fish farmer-te hmalakna te pawh enzuiin enpui thin se a duh thu a tarlang a. Lui sangha tui leh that zawk zia sangha ei thangte chuan an hriat thu tarlangin, kan ram leilung leh tui bakah sik leh sa tha kan neih te hi hmang tangkai a, sangha tui ber chi state pawn pawha thawnchhuah theih tur kan neih theih nan sorkarin hma a la mek a ni tiin, kan fish farmer te pawh midang aia an hnufum bik loh nan hmanrua tha leh tunlai thiamna leh hriatna te inzirtirna neih niin hma lak zel a nih thu a sawi tel a.

Sangha intodelhna kawnga Mizoram hnufumna chhan pakhat chu sangha chi siamna tam tawk kan nei lo hi a ni, Chief Minister chuan a ti a. A tam zawk chu thenawm state atangin chawkluh thin an nih thu leh, kawng thui tak phurh thin an nih avangin an lo chau a, an hrisel loh phah thin thu a sawi a. Mizoramah dil tha tak tak kan neihte hi chung atan chuan hman tangkai theih ni se tiin, chutianga mimal ang zawnga hma la tawh an awm tawh chu thil lawmawm tak a nih thu a sawi a; Sorkar pawhin a theih chinah hma a lak pui chu a tih tur anih thu a tarlang a. A chaw siamna pawh a harsat loh avangin tunah phei chuan Sorkar hmalakna in district tina fish mill nei tura hmalak mek a nih thu sawiin, NLUP leh NEDP hmalakna leh mipui tawiawmna nen thawh ho chuan hun reiloteah Mizoram chu ei leh bara intodelh mai nilovin thawnchhuaktu kan la ni dawn a ni, a ti a.

Khualzahawm Home Minister Pu R. Lalzirliana pawhin thu sawiin, tun hma chuan tur leh bomb/ dynamo hmangin sangha te kan hmang thin a; Changkan lam panin tun hnua Sorkar leh NGO-te thawk hova khawbul lui dung te humhalh tak a nih hnuah heng humhalh chhungah hi chuan sangha a pum phah ta hle a ni, a ti a. Dil sangha te pawh chaw pek that chuan a tam in a tui thei thin hle bawk a ni tiin, fish farmer ten an sangha khawi te enkawl that chu he Fish Festival hian a hrinchhuah pakhat ni se a tih thu a sawi a ni.

Mizoram Fish Festival hian ni thum chhung, (8th - 10th February, 2017) a awh dawn a. Thupui ah “Fish for All” tih thlan a ni a, Vanapa Hall-a hawnna hun hman zawh hian festival buatsaihna hmun, Transport Department New Building Ground Floor-ah khuallian ho hian Stall hrang hrang te tlawh a ni. He Festival-ah hian State pawn atangin CIFE, Mumbai; Fisheries College, CAU, Tripura; NGDB; National Angling Federation leh Cold Water Fisheries Research, Bhimtal, Uttarakhand atang te in an tel a, tualchhung atangin PUC Zoology Department; KVK Lengpui; ZOFISHFED; Aquarium Entrepreneur; Association Mizoram; Agriculture Department; Sericulture Department leh KVI Board-te an tel bawk.

He festival hian a tum ber chu mipuite hnenah sangha hi chaw tha leh hlu a nih zia tarlan a, tunkai thiamna hrang hrang hmanga hlawk zawka sangha tharchhuab dan te vantlang hmelhriat tura chhawpchhuah te leh, sangha tharlam ei tam leh sangha ei tur chi hrang hrang siamte leh a siam dan vantlang hmelhriat tura chhawphchhuah leh vawrh lar a ni. Naktukah hian I&PR Conference Hall-ah India hmarchhak state hrang hrang university atanga mithiam kalkhawm te nen tunlai thiamna hmanga sangha khawi leh humhalh dan te sawihona hun neih a ni dawn bawk.